Денеска ракометарите на Еурофарм Пелистер славеа во Битола над Динамо Букурешт во Лигата на шампионите со резултат 25:24.

После првото полувреме гостите имаа еден гол предност од 13:12 во салата „Боро Чурлевски“.

Ова се важни бодови за македонскиот првак да остане во игра за шестата позиција која води во нокаут-фазата од натпреварувањето.

Во самиот финиш од средбата Романците имаа шанса во својот последен напад да дојдат до бод, но тоа не го дозволи нашиот репрезентативен голман Никола Митревски.

Митревски имаше клучен придонес во триумфот со 16 одбрани, а кај стрелците Тајник запиша шест погодоци.

На спротивната страна Кашпарек пет пати се запиша во листата на стрелците.

На табелата во групата А Еурофарм Пелистер се наоѓа на седмото место со осум бодови, колку што има и Висла Плоцк на шестото место.

Во следното коло играчите предводени од тренерот Раул Алонсо ќе играат на гостински терен против Фуксе Берлин на 27 февруари, а еден ден порано Висла ќе оди кај Динамо Букурешт.