Крајот на големиот 25-годишен јубилеј издавачката куќа „Антолог“ ќе го одбележи со промоција на уште еден нов наслов – збирката раскази „Приказничар“ од Жарко Кујунџиски.

Во книжарницата на „Антолог“ во Центар на 25 декември, од 18 до 20 часот, ќе се одржи предновогодишно книжевно дружење и матине по повод излегувањето на новата книга на Жарко Кујунџиски.

– Кога неодамна се занимавав со јубилеите во 2024 година сфатив дека се навршува и четврт век од моето прво објавено книжевно дело. Расказот „Симбиоза“ се појави во списанието „Студентски збор“ во март 1999 година. Расказот е потценета форма, но истовремено форма со неверојатен потенцијал. Со оваа секавична и фриволна дефиниција секој автор би сакал и самиот да се идентификува, и затоа сметав дека една ваква збирка е најсоодветна за да го обележам овој пишувачки јубилеј со читателите. А кога ќе кажам форма со неверојатен потенцијал, меѓу другото, мислам и на ова: најкратката од овие прози има десет збора, а најдолгата речиси четири илјади зборови – посочува авторот Кујунџиски.

За неговата нова книга кратки осврти напишаа повеќе писатели и книжевни критичари, а театрологот Јелена Лужина истакнува: „Секаков обид за прераскажување на неговите раскази би бил смешен. Соништата не се прераскажуваат туку – се сонуваат“.

Писателот Венко Андоновски, исто така, направил длабок прочит на „Приказничар“: „Кујунџиски е мајстор на расказот, мајстор на разумот чиј корен е во срцето. На едно место, во еден расказ, пишува за себе, за тоа дека расказите ги пишува најпрвин во главата. Но, по прочитувањето, сосема е јасно дека нему разумот не му е спротивен на срцето. Како во молитвата: тој мисли со срцето. Затоа и му се случува да напише нешто толку топло, искрено и чудесно, што сигурен сум, ќе ја смени физиономијата на современиот македонски расказ.“

Збирката раскази „Приказничар“ е посветена на Франц Кафка, бидејќи излегува во годината која ја нарекуваат Годината на Кафка и бидејќи личните метаморфози на Жарко Кујунџиски се основната инспирација на пишувањето кратка проза.