Партијата „Левица“ реагира за отказот што во Клиниката за респираторни заболувања кај децата „Козле“ го доби специјалистот за бронхоскопија доктор Веселинка Митровска Јосифова. Таа беше отпуштена од страна на директорката Каролина Симоновска, иако на 31.12.2024 година добила наредба да биде дел од бронхоскопскиот тим што ги вади залетнатите туѓи тела од дишните патишта на децата.

Јавноста е сведок на уште еден скандал во македонското јавно здравство, овој пат во Специјалната детска болница „Козле“. Директорката Каролина Симоновска, поставена од ВМРО-ДПМНЕ, спроведува класичен партиски терор врз медицинскиот кадар, деградирајќи искусни лекари и заменувајќи ги со послушници без потребното професионално искуство.  Според достапните информации, во одделението за бронхоскопија до пред три месеци работеле три искусни докторки, меѓу кои специјалист со 22 години искуство. Токму овие докторки биле исклучени од тимот, бидејќи директорката не сакала да им исплаќа 2.000 денари за приправност. Останатите две колешки писмено се изјасниле дека нема да преземат одговорност без поддршка од поискусните докторки – што е за поздравување, бидејќи одбиле да бидат дел од небезбедна практика, се наведува во партиското соопштение од „Левица“. 

Партијата обвинува дека директорката Симоновска продолжила со теророт и поставила кадри без доволно искуство а началниците се сменети со специјалисти кои имаат само две години стаж – со што болницата практично се претворила во експериментален терен.

Дополнително, специјалистот со 22 години работен стаж е отпуштена додека била на боледување, а истовремено ѝ е укинато здравственото осигурување – што претставува незаконски и нечовечки акт. Левица прашува: Дали здравствениот систем во Македонија стана приватен бизнис на ВМРО-ДПМНЕ, каде се поставуваат партиски кадри по принципот „послушност пред стручност“? Кој ќе сноси одговорност доколку неквалификуван медицински персонал загрози живот на дете? Дали министерот Таравари ќе ја разреши директорката Симоновска или нејзината партиска поврзаност е поважна од безбедноста на децата? Ваквиот однос кон јавното здравство е директна закана за здравјето на граѓаните, а Левица нема да дозволи оваа политичка узурпација да помине без одговорност. Бараме итна ревизија на одлуките на директорката и нејзино разрешување, бараат од „Левица“.

Министерот Таравари допрва треба да се изјасни за тоа дали ќе спроведе смена на директорката во „Козле“. Тој во петокот го уверуваше сопругот на отпуштената специјалистка дека таа нема да остане без работа, но го избегна прашањето што ќе се случува со директорката Симоновска.