Скандалозниот случај каде студентка по медицина, се вработила во болницата во Гевгелија со фалсификувана диплома, после што добила и платена државна специјализација по анестезиологија и интензивна нега без да има дипломирано и без да има лиценца од Лекарската Комора, го отвори прашањето за ревизија на дипломите во сите јавни здравствени установи.

Министерот за здравство Арбен Таравари смета дека сегашната пракса е добра и доволна, односно дека контролите што се прават во болниците при вработувањето се задоволителни.

За него опасно е недимпломиран доктор да биде присутен во операционите сали на специјализација со години, но нема да иницира никакви промени или проверки и покрај тоа што во системот се протнал ваков случај и не е познато колкава е магнитудата на проблемот, односно дали и колку други вакви случаи постојат во државното здравство.

Секако дека е опасно. Тоа веќе не е работа на Министерството за здравство. Тоа е веќе работа на Обвинителството да преземе одредени мерки да се казнат и да не се повторуваат ваквите случаи. Ние ќе продолжиме со стандардната процедура. Секој што се вработува, обврска е на институцијата да ги побара сите неопходни документи и тие да бидат оригинални, нормално, рече Таравари.

Од Лекарската Комора пак споделуваат поинаква слика – во нивните простории стојат изработени лиценци за работа, кои никој не доаѓа да ги подигне.

Податокот дека во Комората има изготвени, а неподигнати лиценци говори дека веројатно на тие доктори не им било побарано да ги достават до здравствената установа каде се вработени, велат од Лекарската Комора за „Слободен печат“.

Оттаму сметаат дека за да се спречат ситуации како онаа со докторката во Гевгелија, треба здравствените установи пред да реализираат ново вработување, задолжително да проверат во Лекарската комора дали докторот има важечка лиценца за работа.

Проверка треба да прават и факултетите кога запишуваат специјализации, за да се сигурни дека кандидатот има завршено факултет и има лиценца за работа. Истото би требало да го прави и Фондот за здравствено осигурување кога ги потпишува договорите со приватните здравствени установи, велат од Лекарската комора за „Слободен печат“.

Инаку, според важечките законски прописи, проверка на документите при вработување во здравствените установи, јавни или приватни, прави самата болница, која согласно своите надлежности и законски дефинирани услови носи одлука за вработување и ја регулира оваа релација понатаму. Дел од болниците во Комората проверуваат кого ќе вработат, на начин што контролираат дали лиценцата на кандидатот е валидна.

Комората секогаш е отворена за соработка и постапува по добиени барања за проверка дали одредено лице е носител на активна лиценца за работа на доктор. Вакви барања за проверка сме имале од државни институции, правни и физички лица и по нив ажурно се постапува. Ги охрабруваме болниците секогаш кога имаат дилема да побараат да се изврши проверка, но и ажурно да бараат докторите да ги доставуваат лиценците и другите потребни документи до нив, велат од Лекарската Комора.

Откако „Слободен печат“ го објави скандалот во болницата во Гевгелија, каде докторка без завршен медицински факултет, добила државна специјализација по анестезиологија и интензивно лекување, што значи дека специјалистичкиот стаж го поминала во операционите сали во скопските клиники иако уште била само недипломирана студентка – Јавното обвинителство Гевгелија вчера отвори предмет по допрен глас.

Основното јавно обвинителство Гевгелија денеска оформи предмет по допрен глас и презема дејствија за проверки и обезбедување на докази, информираат од Јавното обвинителство за „Слободен печат“.

Целиот скандал се расветли, откако докторката А.А. својата прва и единствена валидна лиценца од Лекарската комора ја добива во април 2024, а уверението за специјалист по анестезиологија во јули 2024.

Сите што виделе дека меѓу двата датуми има само три месеци разлика, сфатиле дека таа прво „специјализирала“ па потоа дипломирала, што е незаконски и повлекува низа последици и за пациентите.  Специјализацијата ѝ е поништена, меѓутоа нејзиното присуство во операциониоте сали изминатите години е неспорен факт, затоа што специјализацијата вклучува практична работа во операциони сали на повеќе клиники.

Извори за „Слободен печат“ велат дека А.А. била во салата за породување во Чаир, во самата гевгелиска болница, а кога ќе се види програмата за специјализација јасно е дека морала да биде и во интензивна нега и во други болници во Скопје како дел од нејзината едукација.

Неа болницата ѝ исплаќала и плата, надоместок за одвоен живот и специјализација, па после дисциплинската постапка и отпуштањето од работа, потпишала да врати 120 илјади евра во рок од 6 месеци.

ВИДЕО | Докторка од Гевгелија – „доктор“ за фалсификати