Косовскиот премиер Албин Курти изјави дека нема сознанија оти во неговата влада постои некаков план за формирање заедница на српски општини во Косово, како што тоа го сугерираше специјалната известувачка за Косово во Европскиот парламент, Виола вон Крамон во синоќешното интервју за косовската КТВ.

Како што јави дописникот на МИА од Приштина, во изјава за новинарите по денешната седница на Владата на Косово, Курти изјави дека останува на ставот оти во Косово веќе постои заедница на општините, а Уставот на државата не дозволува формирање државни заедници по етничка основа.

„Косово има заедница на општините и мене како премиер таа заедница ми е достатна. Јас немам сознанија за некој план на асоцијација на општини со српско мнозинство. Уставот не дозволува асоцијации по етничка основа“, рече Курти.

Тој додаде и дека, доколку се прашаат косовските граѓани, „никому не му е приоритет една таква заедница“.

„Доколку ги прашате граѓаните на Косово, без разлика на нивната етничка и верска припадност, никому не му е приоритет една таква заедница. Сите тие сакаат работни места, правда, образование и здравство. Сакаат борба против корупцијата. Затоа нашата влада е влада на сите граѓани, не само на Албанците. Ги прифаќаме барањата од сите, ги браниме правата на сите“, изјави Курти.

Извор: МИА