Во администрацијата која практично со државата заснова службенички однос, се исплатуват плати под минимален износ. Ова го откри претседател на Синдикатот на работниците од управата, правосудни органи и здруженија на граѓани (УПОЗ), Трпе Деановски на денешната прес конференција посветена на минималната плата.

– Две категории на вработени во администрацијата и во правосудството се единствени по тоа што 2 години земаат плата под минималната. Тоа се помладите референти кои се уште добиваат плата од 14.500 денари и референтите кои се` уште добиваат плата од 14.980 денари, иако минималната плата е 15.194 денари – рече Деановски.

УПОЗ денеска упати барање до Владата заедно со измената на Законот за минималната плата во скратена постапка да се направат измени и на посебните закони кои ги регулираат платите на вработените во администрацијата и правосудството на начин што вредноста на минималната плата да се земе како основ на плата и сите вработени да имаат одредени бодови за ниво.

На овој начин, според нив, ниту еден вработен во администрацијата не би бил на минимална плата и прв пат во историјата ќе имаме усогласување на платите со минималната плата во администрацијата и правосудството. Во спротивно, тие најавија дека ќе бидат приморени да ја активираат одлуката донесена во ноември и незадоволството на вработените да го изразат преку протести или преку други форми на притисок за други форми на штрајк.