Краткометражниот игран филм „Шеќерни луѓе“ во режија на Сузана Диневски, реализиран од „Сузи Кју Продукција“, освои четири награди во изминатите три месеци на различни интернационални фестивали за краткометражни филмови.

Филмот освои награда за Најдобра оригинална музика (композитор Дуке Бојаџиев) на „Сине Париз филм фестивал“, награда за Најдобар постер (дизајн на Коста Лазаревски) на „Торонто вомен филм фестивал“, како и награда за Најдобра актерка (Сара Климоска) на „Киц Берлин филм фестивал“ и на „Реале филм фестивал“.

Филмот „Шеќерни луѓе“, кој е реализиран со поддршка на Агенцијата за филм и „Сузи Кју Продукција“, досега е селектиран во официјалната програма на 12 интернационални фестивали за краткометражни филмови во САД, Канада, Франција, Германија, Албанија, Италија и Парагвај, а ја имаше својата светска премиера на 22-то издание на филмскиот фестивал во Беверли Хилс во САД на 4 јуни 2022.

Главните улоги ги играат Сара Климоска и Филип Трајковиќ, сценариото е на Владимир Јанковски и Сузана Диневски, директори на фотографија се Димитар Попов и Дејан Димески, а монтажата е на Гоце Кралевски. Дизајнер на постерот е Коста Лазаревски, трејлерот е изработен од Горан Вуќиќ, тонски дизајнер е Дарко Спасовски, а музиката компонирана за филмот е на Дуке Бојаџиев.

(Текстот е објавен во „Културен печат“ број 154, во печатеното издание на весникот „Слободен печат“ на 12-13 ноември 2022)