Денеска настапи и последниот осми наш спортист на Летните олимписки игри во Токио, иако се вбројуваше во Топ 4 фаворити за освојување на медал, борачот Магомедгаджи Нуров не успеа во својата шанса да се искачи на подиумот.

После победата над Тунижанецот Саадуи Мохамед во категоријата до 97 килограми, следуваше поразот во четвртфиналето Ринерис Салас Перез од Куба.

Нуров ја чекаше шансата да влезе во репасажот за да го одржи во игра за бронзата, но Кубанецот Салас Перез не му направи „услуга“ кој загуби од Абдулрашид Садулаев со 4:0.

Претставникот на Рускиот олимписки комитет Садулаев уште еднаш докажа зошто е фаворит за златото во оваа категорија и во финалето ќе се бори против  Фредерик Кајл Снајдер (САД) кој со 5:0 го совлада Сулејман Карадениз (Турција).

Македонското борење останува со еден медал на Олимписките игри, оној од 2000 година во Сиднеј кога бронзен беше Могамед Ибрагимов.

На тој начин Македонија го заврши настапот на Игрите во Токио, со еден сребрен медал кој го освои Дејан Георгиевски во таеквондо (категорија +80 кг.)