Кошаркарската репрезентација на Македонија во августовските претквалификации за ЕП 2025 ќе биде предводена од нов селектор откако денеска Драган Бајиќ и кошаркарската федерација на Македонија (КФСМ) се договорија за предвремен раскин на договорот.

Бајиќ на селекторското столче седна на 19 април 2021 година и по точно 15 месеци си замина и тоа откако имаше катастрофален учинок во првата рунда од квалификациите за пласман на СП 2023. Македонија загуби на сите шест натпревари во квалификациите, од Шпанија, Украина и Грузија поради што патот за пласман на Евробаскетот 2025 ќе го започне од претквалификациите.

– КФСМ би сакала да ја извести јавноста дека македонската „Куќа на кошарката“ и г. Драган Бајиќ, взаемно се спогодија да ја прекинат соработката околу негов понатамошен ангажман во машката сениорска репрезентација на Македонија. Од оправдани причини, односно здравствени проблеми со кои се соочува во изминатиот временски период, г. Драган Бајиќ повеќе не е во можност максимално посветено да одговори на обврските кои со себе ги носи работењето во сениорскиот национален тим. Земајќи ја предвид потребата машката „А“ селекција да има стратег кој секојдневно ќе биде посветен и во тек со сите збиднувања поврзани со репрезентацијата, како и оддалеченоста и професионалните клубски обврски на досегашниот селектор, обете страни пријателски и фер се сложија околу прекинувањето на соработката. Во оваа прилика, би сакале да му се заблагодариме на Драган Бајиќ, како и на неговите соработници, Адмир Прасовиќ и Александар Кукриќ за досегашното работењe со нашата најдобра селекција! – соопшти КФСМ.

Следна репрезентативна акција за кошаркарите ќе бидат претквалификациите за пласман на ЕП 2025, а Македонија ќе игра против Словачка, Данска и Норвешка.