Кордалов: Отчетот мора да биде форма на секој функционер кој троши пари на граѓаните
Комуниологот Бојан Кордалов смета дека негативно за сите политички актери е што не созреале самите да направат отчетна компетентна за сработеното, туку постојано си наоѓаат теми за да се испокараат. Тој додава дека граѓаните се тие кои одлучуваат која партија е подобра.
-Како да не веруваат дека граѓаните ќе расудуваат кој е подобар. Не се водат од тоа дека граѓаните се свесни, туку дека ако 1.000 пати повторите една теза дека граѓаните ќе им веруваат. Позитивно е тоа што има отчетност. Но отчетот не припаѓа на една партија туку е форма на секоја добра политичка комуникација и добро владеење и мора да биде форма за секој функционер кој троши пари на граѓаните собрани од даноци. Во следните до две години ако парламентарните избори се оддржат во редовниот термин и СДСМ и ВМРО-ДПМНЕ ќе мора да им докажат на граѓаните дека повеќе заслужуваат да го предводат следниот мандат на извршната власт. Градоначалниците на ВМРО-ДПМНЕ ќе мора да докажат дека обвинувањата од СДСМ дека наводно се враќа режимот и старите пракси од минатото се неточни. Од друга страна, централната власт предводена од СДСМ и коалицијата треба да докажат дека обвинувањата од ВМРО-ДПМНЕ дека се неспособни и неефикасни се неточни. Наместо да се караат кој е подобар или уште пострашно да се докажуваат кој е поголемото зло, односно кој е полош, треба јасно да ги изложат приоритетите, остварените ветувања и да ги вклучат на граѓаните во процесите на одлучување преку нивни сугестии и предлози – вели Кордалов.