Селекторот на италијанската репрезентација (у21), контроверзниот стручњак Силвио Балдини бара од неговите фудбалери да тренираат со превез преку едното око. Според него, ваквиот метод има повеќе предности?!

Тоа е неверојатен метод што тој веќе го практикувал на клупско ниво, особено кога ги тренираше Пескара и Палермо во Серија Ц.

– Кога видот е делумно ограничен, мозокот би се фокусирал повеќе на координацијата на движењата, а помалку на физичкиот напор. Овој метод, исто така, служи за да ги натера играчите да работат како да имаат попреченост. Тие се принудени да се концентрираат повеќе, што ја подобрува нивната брзина на извршување и нивните рефлекси. На овој начин, тие можат подобро да се адаптираат и да реагираат на тешки ситуации – се вели во текстот објавен во „Газета дело спорт“.

Ексцентричниот Балдини, кој стана озлогласен во 2007 година откако го шутна својот колега Доменико Ди Карло во задникот за време на натпревар, исто така ги изненади своите нови играчи со тоа што им забрани да користат „паметни телефони“.