Сигурно е дека вештачката интелигенција ќе донесе големи нарушувања на пазарот на трудот, но сè уште е тешко да се предвиди до кој степен технологијата ќе ги замени луѓето на работното место, а во која ќе биде само помошник за да ја извршуваме својата работа подобро.

Загрозени се бројни работни места – од администрација до банкарски сектор, а она што можеби изненадува е тоа што вештачката интелигенција (ВИ) исто така се покажа доста успешна и во креативните работни места. Експертите за пазарот на трудот предупредуваат дека нивните работни места нема да ги преземе вештачката интелигенција, туку луѓето кои знаат да ја користат, односно оние кои многу подобро ќе ја извршуваат работата со помош на технологијата.

Во моментов, се чини дека најбезбедни се физичките работници како што се градежните работници, керамичарите и слично, но со развојот на напредните роботи и ова може долгорочно да се промени. Краткорочно, загрозени се голем број професии во кои работата се врши исклучиво со помош на компјутери.

Сите не се согласуваат со Бил Гејтс.

Кој е најзагрозен, а кој може да биде (релативно) безбеден од технологијата – мислењата се различни, но интересно е да се слушне како Бил Гејтс гледа на таа тема.

Долгогодишниот шеф на „Мајкрософт“ издвои три професии кои, според него, се безбедни од вештачката интелигенција. Неговото размислување е доста интересно, бидејќи е во спротивност со некои општи ставови во технолошката индустрија. Имено, една од овие професии е – кодирањето.

Вештачката интелигенција досега се покажа мошне успешна во кодирањето, а неодамна дури и извршниот директор на „Енвидија“ (Nvidia), Џенсен Хуанг, им порача на младите добро да размислат пред да се одлучат за кариера во софтверскиот развој, токму поради напредокот и можностите на вештачката интелигенција. Сличен став има и извршниот директор на „Селсфорс“ (Salesforce), Марк Бениоф, кој неодамна изјави дека неговата компанија сериозно размислува воопшто да не вработи софтверски инженери оваа година.

Иако Гејтс се согласува дека вештачката интелигенција е одлична во кодирањето, тој верува дека луѓето сè уште се неопходни во тој процес. Тие се потребни за да се идентификуваат и исправуваат грешките, да ги приспособуваат и менуваат алгоритмите и да обезбедат поддршка за вештачката интелигенција во текот на развојот. Иако ова има смисла, се чини дека вештачката интелигенција сепак би можела да го преземе најголемиот дел од работата во овој процес, додека помалку луѓе би биле потребни за поддршка и корекција на грешките, што значи дека многумина сепак би останале без работа, пишува „Унилад Тех“ (Unilad Tech).

Втора безбедна професија, според Гејтс, се биолозите. Иако вештачката интелигенција е исклучително добра во дијагностицирање на болести и анализа на ДНК, ѝ недостига креативност потребна за биолошките истражувања и научните откритија.

Третата професија која според Бил Гејтс би можела да биде безбедна од вештачката интелигенција се однесува на енергетските експерти. Тоа е, како што вели тој, премногу сложена професија за да биде целосно автоматизирана. ВИ, се разбира, ќе помогне во остварувањето на глобалните климатски цели, но технологијата нема да може да ги замени луѓето во оваа индустрија.