Конкурсот за издавање учебници во деветгодишното основно образование е запрен бидејќи ќе следуваат измени и дополнувања на Концепцијата за основно образование. Оваа одлука е донесена согласно заклучокот од седницата на Владата од минатата недела, објави Министерството за образование.

Измените на Концепцијата, од МОН велат дека се „во насока на соодветно изучување на научните дисциплини историја, географија, биологија, хемија и физика како посебни наставни предмети, а кои сега се изучуваат интегрирано во наставните предмети „Историја и општество“ и „Природни науки“ (од шесто до деветто одделение)“.

Јаневска за „Слободен печат“: Невозможно е за една недела да се решат сите наследени проблеми

-Истото е со цел учениците потребните знаења, вештини и ставови од овие наставни предмети да ги стекнуваат согласно националните стандарди на крајот од основното образование, како и да се обезбеди меѓународна споредливост на постигнувањата на учениците на определена возраст во основното образование – наведува МОН.

Во објавата за запирање на Конкурсот кој е објавен пред три месеци, МОН го известува авторот односно авторите кои доставиле ракопис во архивата на Педагошката служба, заклучно со 8 јули 2024 година, дека тој може да се подигне од Педагошката служба најдоцна 15 дена од објавата на ова соопштение.

Јаневска: Ќе останат само добрите решенија на Царовска

Министерката за образование и наука Весна Јаневска во петокот на прес-конференција го соопшти заклучокот на Владата за одложување на имплементацијата на дел од Концепцијата што се однесува на седмо, осмо и деветто одделение во однос на наставните планови и програми, како што рече, „без да бидат засегнати изборните предмети за кои сметаме дека се добро решение во идниот процес на образование кај младите“.