Италијанската уметница позната како Лајка предизвика големо внимание и контроверзи во Рим, откако преку ноќ во главниот град на Италија се појави нејзин мурал на кој се прикажани израелскиот премиер Бенјамин Нетанјаху и нацистичкиот водач Адолф Хитлер како се бакнуваат во страсна прегратка.

Муралот е насловен „Конечно решение“, при што се прави паралела меѓу планот на Хитлер за уништување на еврејскиот народ и акциите на Нетанјаху за истребување на Палестинците во Газа.

Како што се наведува, ова дело претставува критика на актуелната израелска опсада на Појасот Газа и на безмилосното убивање цивили, жени и деца од страна на војската под команда на Нетанјаху.

Таинствената уметница, позната само како Лајка, вели дека „избрала екстремна слика за да го потресе печатот и јавното мислење“, пренесува „Тајмс оф Израел“.

„Израелската влада, со поддршка на Соединетите Американски Држави и Европската Унија, спроведува систематска операција за уништување на палестинскиот народ“, додава таа.

Во објава на „Инстаграм“ во која дополнително го оправдува уметничкото дело, таа вели дека последната голема офанзива на ИДФ во Газа е „конечното решение за ова ужасно етничко чистење, за овој геноцид“.

Таа ја повикува Италија и ЕУ како целина да воведат санкции врз Израел поради агресијата врз Газа, истакнувајќи дека „Европа ја санкционираше и изолираше Русија за инвазијата на Украина, но зазеде мек став“ кога станува збор за наводните израелски воени злосторства.

„Италија и Германија, повеќе од кој било друг, одлучија повторно да бидат на погрешната страна од историјата“, изјавува Лајка. „Ништо не научивме од минатото“.