Концерт на Јордан Костов квартет ќе се одржи во КИЦ-Скопје
Прв концерт во серијалот „унплагд“, што ќе се реализира во „Салон 19.19“ во рамки на годишната музичка програма на Културно-информативен центар Скопје за 2023 година, ќе биде настапот на Јордан Костов квартет на 25 мај.
Препорачано
На концертот ќе биде презентирана најновата музика на Јордан Костов, компонирана во Токио, Ханој, Сајгон, Кунмумг и на неговиот пат за назад во родната Македонија. Со него на сцена ќе настапат Ајуми Саита (вокал), Саша Саита (перкусии), Андреа Мирческа (контрабас).
Јордан Костов е македонски музички уметник, хармоникаш, пијанист, композитор, импровизатор, аранжер и продуцент. Тој ѝ припаѓа на генерацијата млади македонски уметници кои поодамна имаат раскрстено со предрасудите и кои го имаат надминато стравот од нормална творечка комуникација со глобалниот свет, создавајќи свој, сопствен, уникатен музички израз што упорно им пркоси на сите форми на комерцијалната музика.
Слободна по својата суштина, авангардната музика на овој сестран композитор и инструменталист плови во водите на џезот и музиката на светот, едновремено апсорбирајќи ги влијанијата од класичното творештвото и одржувајќи врска со македонската музичка традиција и нејзините егзотични скали и ритмови.
Како плоден композитор и поткован инструменталист (класично образование), тој од родното Кавадарци, преку работата со бројни македонски музички колективи („Ансамбл модерна“, „Свирци из Кавадарци“ и „Старовски“), во 2013 година беше поканет да земе учество во реномираниот проект „Swatch Art Peace Hotel“, швајцарско-кинеска програма за иницијатива во културата и уметноста.
За таа намена Костов напиша комплетно нова музика, која во ноември истата година беше изведена со Оркестарот на традиционални инструменти во Шангај. Оттогаш започнува неговата номадска музичка авантура во новото опкружување којашто трае до денес и која спорадично е прекинувана со кратките негови престои во родната Македонија. Настапот на Јордан Костов Ансамбл на Скопскиот џез фестивал претставуваше концертна промоција на албумот „Intertwining a Fugue“, најновото издание на „СЏФ Рекордс“.
