Српскиот културно-информативен центар „Спона“ го продолжува циклусот книжевни средби и работилници „Паралели и синтези: Рецепцијата на современата македонска книжевност“, во којшто во фокусот се дела од современи македонски автори што изминативе години се објавени и во Република Србија во превод на српски јазик.

На 4 јуни, со почеток во 20 часот, во кафе-книжарницата „Буква“ ќе се одржи книжевна вечер со еден од највлијателните македонски писатели на XXI век, Петар Андоновски. Средбата е посветена на српското издание на романот „Страв од варвари“ („Strah od varvara“, Beograd: Treći Trg, Srebrno drvo, 2021).

На настанот, со свои видувања ќе се вклучат и лекторката по српски јазик на Филолошкиот факултет „Блаже Конески“ при УКИМ – Јелена Макевиќ, преведувачката – Милена Илиќ и книжевникот и програмски директор на „Спона“ – Милутин Станчиќ. Модератор на книжевната вечер ќе биде Иван Антоновски. Во рамките на средбата ќе се оствари разговор со Андоновски во којшто со прашања ќе може да се вклучат и присутните.

Романот „Страв од варвари“ е објавен во 2018 година, а во 2020 година, за него, Петар Андоновски ја доби Наградата за литература на Европската Унија, додека српскиот превод беше објавен годината потоа. Како што меѓу другите има истакнато и еден од најупатените книжевни критичари во регионот, Саша Чириќ, „во романот на Петар Андоновски, најдобра е таа згусната атмосфера на нетрпеливост, потиснати тензии и безизлезни ситуации во кои, како во лудачка кошула на нормалноста, ликовите се прпелкаат во преземените улоги и наследените позиции.“

Романот „Страв од варвари“ доби многубројни книжевни рецензии, а меѓу нив е „вистинско освежување на регионалната книжевна сцена“, како што оцени Мирела Грачанац од „Побуњене читатељке“.

„…ова е пофалба за смирувачката и хранливата моќ на зборовите, единственото сидро за кое човек може да се држи за да не се удави во очајното море на осаменоста. Но, во исто време, ова е и осуда за страшната моќ што самиот збор може да ја преземе кога е погрешно сфатен, како онаа на ‘варварите’, затоа што тие „брборат“ нејасни звуци, па се доживуваат како опасност.“ – има посочено за „Страв од варвари“, Марко Остони. „Фасцинантен е начинот на кој книгата се чита како алегорија од некоја далечна епоха и како современ роман што зборува за нашите, за жал, претешки времиња.“, истакнува Глен Џејмс Браун.

„Но, кој е всушност варварин, а кој цивилизиран?! Зар и во цивилизираните не се кријат варвари?! Кој кого загрозува?! Зошто варварите се вознемирувачка другост?!.. …Конечно, што се крие зад стравот од варвари?!“ – истакнува Лидија Капушевска-Дракулевска во поговорот на македонското издание.

Ова се само дел од дилемите врз чијшто фон, Петар Андоновски ја структурира композицијата на овој роман. На оваа книжевна средба, одново ќе се отворат и овие дилеми, седум години по првообјавата на романот.