Културно-информативниот центар – Скопје ја најави промоцијата на книгата „Празно место“ од Снежана Стојчевска, која ќе се одржи на 25 ноември во „Салон 19.19“.

Издавач на книгата е „Современост“, промотор ќе биде Љупка Антеска, а стихови ќе читаат Катерина Гогова, Биљана Стојановска и Долорес Атанасова-Лори, додека музичката поддршка е на Владимир Стојчевски на гитара.

„Празно место“ е книга за загубата, за љубовта, за семејството, за секојдневието, за проблемите, за пандемијата, но и за радоста која произлегува од конекцијата со блиските луѓе. Покрај овие теми, отвора прашања и за минливоста на времето, за материјалното и духовното постоење, како и за самата поезија, како начин да се обезбеди вечност.

Снежана Стојчевска (1980) дипломира на Институтот за педагогија при Филозофскиот факултет во Скопје. Од 2008 до 2022 година работи во филмската продукција „Квазар филм“, како координатор продукција.

Во 2012 година ја објавува првата поетска книга „Шеќер по подот“ во издание на „Или-Или“, како дел од едицијата „Русалки“, во која се јавува и како уредник. „Под нулата“ е нејзино второ дело, за кое ја добива наградата „Бели мугри“ за 2013 година, која ја доделува Домот на културата „Кочо Рацин“ – Скопје. По нив следуваат поетските книги „Модри фантазии“ („Темплум“, 2015), „Треба да е лесно“ („Антолог“, 2017), „Ќе се завијам во песни“ („Ми-Ан“, 2019).

Од почетокот на 2018 година е ангажирана како извршен уредник на списанието за литература, култура и уметност „Современост“. Истата година станува дел од европска платформа за поети и фестивали „Версополис“. Во 2019 се јавува како приредувач и уредник на арт-панорамата „Допир“ во издание на „Арт еквилибриум“ – Гевгелија.

Член е на Друштвото на писателите на Македонија. Член е на организацискиот одбор на Скопски поетски фестивал, чие прво издание се одржа во септември 2021 година. Од април 2022 година ја извршува функцијата директор на ЈУ Градска библиотека „Браќа Миладиновци“ – Скопје.

(Текстот е објавен во „Културен печат“ број 155, во печатеното издание на весникот „Слободен печат“ на 19-20 ноември 2022)