Спортот во нашата земја ќе продолжи, како и борбата против коронавирусот, но Владата на последната седница донесе одлука според која клубовите ќе мора да прават ПЦР тестови  пред секој натпревар.

– Согласно одлуката на Влада на Република С. Македонија објавена во Службен весник бр. 87 со датум 20.04.2021, Одлука за изменување и дополнување на одлуката за превентивни препораки, времени мерки, наредени мерки, наменски протоколи, планови и алгоритмки за постапување за заштита на здравјето на населението од заразната болест ковид-19 предизвикана од вирусот SARS-CoV-2, случаите и временскиот период на нивна примена, во член 13 став 1 во точката 2 се менува и се додаваат зборовите: „Освен организирање и одржување на пионерски, кадетски и младински спортски натпревари, како и професионални спортски натпревари, без присуство на гледачи/публика, исклучиво по наменски одобрени протоколи и по претходно извршено PCR тестирање пред одигрување на натпреварот од страна на клубовите“.

Фудбалската федерација на Македонија (ФФМ) за наредното коло во Првата и Втората лига ќе ги покрие финансиски ПЦР тестовите наменети за клубовите од тие натпреварувања.

Ќе помогне и Ракометната федерација на Македонија (РФМ) која ги известува сите ракометни клубови учесници во Супер лига и Прва лига во машка конкуренција и Женска лига Скопско во сениорска категорија при систем на натпревари на РФМ ќе достави Rapid PCR тестови за детекција на заразната болест ковид-19 предизвикана од вирусот SARS-CoV-2.

Тестирањето треба да се спроведе најрано 24 часа пред одигрување на натпреварот и резултатите заедно со формуларот веднаш да бидат доставени до Ракометната федерација на Македонија, но не подоцна од 10.00 часот на денот на одигрувањето на натпреварот.