Поранешниот шампион во бокс во тешка категорија, Украинецот Владимир Кличко размислува за враќање во рингот. Само два дена по објавата на линеарниот шампион во тешка категорија, Тајсон Фјури дека оди во пензија, 46-годишниот Кличко изјави дека ќе се обиде да се врати во рингот.

– Зошто да не, ако сум во добра форма. Можеби сонувам да го соборам рекордот на Џорџ Форман. Дефинитивно ме мотивира кога секое утро станувам и спортувам – рече Кличко во интервју за „Билд“.

Кличко пред неколку години изјави дека за него би било предизвик да го собори рекордот на Форман и да стане најстариот боксер во историјата кој се борел за светската титула, но тогаш нагласи дека не планира да го стори тоа.

Форман имаше 45 години, девет месеци и 25 дена кога го победи 18-годишниот Мајкл Мурер и стана шампион во ВБФ и ОБФ верзиите.
Владимир Кличко кариерата ја заврши во 2017 година со скор од 64 победи во 69 професионални мечеви.