В четврток од 09.30 часот наутро по македонско време ќе се игра првиот полуфинален меч на грен слем турнирот „Австралија опен“ помеѓу Рожер Федерер и Новак Ѓоковиќ.

Тоа ќе биде јубилејна 50 битка меѓу двајцата тениски великани, а моментно води српскиот ас во меѓусебните дуели со 26:23.

На последниот дуел Швајцарецот беше подобар на Завршниот мастерс турнир во Лондон минатата година во ноември со 6:4 и 6:3. На тој начин ја прекина низата на Ноле од четири победи по ред која траеше од 2015.

– Новак игра одлично тука. Тој е шампион, особено во Австралија и овде сака да игра. Имавме епски мечеви во минатото. Морам да се чувствувам подобро, во спротивно ќе одам на скијање – рече Федерер после триумфот над Тенис Сандгрен.

Во минатото имало навистина возбудливи пресметки меѓу двајцата тенисери, во продолжение можете да ги погледнете најинтересните резултати:

– 2020 „УС Опен“, полуфинале: Ѓоковиќ (3 носител)-Федерер (2 носител) 5:7, 6:1, 5:7, 6:2, 7:5.
– 2011 „Ролан Гарос“, полуфинале: Федерер (3)-Ѓоковиќ (2) 7:6, 6:3, 3:6, 7:6.
– 2011 „УС Опен“, полуфинале: Ѓоковиќ (1)-Федерер (3) 6:7, 4:6, 6:3, 6:2, 7:5.
– 2014 „Вимблдон“, финале: Ѓоковиќ (1)-Федерер (4) 6:7, 6:4, 7:6, 5:7, 6:4.
– 2019 „Вимблдон“ финале: Ѓоковиќ (1)-Федерер (2) 7:6, 1:6, 7:6, 4:6, 13:12 (7-3).

Потсетување дека во втората полуфинална битка во Мелбурн в петок во истиот термин Доминик Тим ќе ги одмери силите против Александар Зверев.