Тим последен полуфиналист, подобар од Надал во четири сета
Петтиот носител го совлада Рафаел Надал во четвртфиналето на Австралија Опен со 3:1 во сетови.
Доминик Тим е последен полуфиналист на Австралија Опен откако по четири часа и 13 минути голема борба во четири сета со 7:6,7:6,4:6,7:6 го победи Рафаел Надал.
Австрискиот тенисер во полуфиналето ќе игра против Александер Зверев, и ова ќе биде прво полуфинале за него на Австралија Опен.
Во првите два сета, Надал прв доаѓаше до брејк предност, но Тим и во двата наврати успеваше да се врати во игра и во тај брејкот да ги освои и двата сета. Одличната игра и на двајцата тенисери беше главна одлика на нивниот дуел. Тим имаше повеќе среќа, но и максимално ги користеше своите шанси.
Во третиот сет, немаше ниту една шанса за брејк во првите девет гема, за потоа Надал при резултат 5:4 да ја искористи првата укажана шанса и да го освои сетот.
Четвртиот сет започна со брејк шанси за Надал, тој дури три брејк топки не успеа да реализира, по што во наредниот гем, Тим ја искористи својата шанса и дојде до брејк за водство од 2:1 во гемови.
Австриецот предноста ја чуваше се до самиот финиш кога му „се стегна“ раката и наместо да го освои сетот со 5:4, тој му дозволи на Надал да направи брејк и да ја продолжи неизвесноста која траеше се до тај брејкот.
Во него, Тим беше поуспешен, ги искористи подароците од Надал и триумфира со 8:6.
Во првото полуфинале, кое се игра утре сабајле (9.30 ч.) ќе играат Новак Ѓоковиќ и Рожер Федерер, додека наредниот ден, во петок, ќе играат Тим и Зверев.