Ќе има ли обвинение за смртта на Фатмата?
Наскоро ќе се знае дали јавниот обвинител ќе покрене обвинение за полицаецот кој ја застрела мигрантката Фатмата од Сиера Леооне, на македонско-грчката граница. Нему му е одзеден пасошот како мерка за претпазливост.
Препорачано
Во меѓувреме, сопругот на Фатмата е во земјава и не ја прифатил понудата да го продолжи миграцискиот пат кон Западна Европа туку побарал азил во Македонија. Единствената причина поради која е во Македонија е да најде правда за сопругата која била застрелана во негово присуство и умирала на неговите раце. Организацијата „Секонд Три“ која работи со мигранти, му помага на Абу Бакар да го врати телото на Фатмата дома во Сиера Леоне. Овој процес е многу скап, велат од „Секонд Три“ и се собираат донации од луѓе и организации.
Случајот во кој мигрантката беше застрелана на границата дојде до Европскиот Парламент од каде група пратеници доставија парламентарно прашање до Европската Комисија за убиството на Фатмата.
„Разговаравме со неколку луѓе кои работат за важни институции и тие го изразија својот интерес за случајот. Личноста чија смрт беше регистрирана како уште една смрт на мигрант, сега е запаметена, луѓето се борат за неа. Тоа нема да ја врати, ама се надеваме дека ќе помогне работите во иднина да се сменат“, велат од „Секонд Три“.
Јавното обвинителство ја продолжува истражната постапка за случајот во кој мигрантката Фатмата од Сиера Леоне беше застрелана кај Гевгелија од страна на полицаец. Предметниот јавен обвинител ги презема сите неопходни дејствија за расветлување на случајот. По добивање на извештајот од обдукцискиот наод ќе биде донесена јавнообвинителска одлука за понатамошниот тек на постапката. Предметниот обвинител од Специјализираното одделение за гонење на кривични дела сторени од лица со полициски овластувања и припадници на затворската полиција, до Основниот кривичен суд – Скопје побара на осомничениот полицаец да му бидат изречени мерки на претпазливост.
Судијата на претходна постапка го прифати предлогот и на осомничениот со Решение му определи обврска да се јавува повремено на определено службено лице или кај надлежен државен орган и привремено му е одземена патната или друга исправа за преминување на државната граница, односн забрана за нејзино издавање, велат од Јавното обвинителство за „Слободен печат“.
Фатмата беше убиена на 19 април откако службено лице испука куршум од службениот пиштол. Полицијата излезе со соопштение за настанот, но тоа соопштение е спротивно на она кое го тврдат мигрантите кои биле присутни, вклучително и сопругот на Фатмата Абу Бакар, кој во Македонија побара азил и сака по судски пат да бара правда за неговата сопруга. Полициската верзија на настаните е дека откако мигрантите биле забележани во две возила, полицијата се обидела да ги запре, а притоа еден од шверцерите, 26 годишниот К.Ј. физички го нападнал полицаецот обидувајќи се да му го одземе пиштолот.
,,Притоа полицискиот службеник испукал од службениот пиштол и погодил еден од мигрантите жена, која веднаш била пренесена до Итната помош каде починала, известија од МВР дента кога се случи немилиот настан.
Но, сестрата на Фатмата во видео обраќање до македонската јавност кое го испрати до редакцијата на „Слободен печат“ повикува граѓаните да им се приклучат во барањето на правдата и прашува зошто полицаец пукал во невооружена девојка додавајќи дека немало никаков физички напад врз полицаецот.
„Министерството за внатрешни работи тврдеше дека полицискот службеник пукал, зашто имало физички напад меѓу возачот и полицаецот. Ова не е вистина. Абу Бакар беше таму, други луѓе беа таму: Немаше физички напад. Ова е лага. Сакаме правда за Фатмата и сакаме луѓето од Македонија да се борат со нас. Сакаме да ја знаеме вистината. Зошто полицаецот застрела невооружена девојка? Сакаме фер и транспарентно судење и одговори на прашањата кои нè измачуваат. Единственото што би можело да ни даде малку мир, или барем некакво олеснување – е да биде утврдена вистината за убиството на Фатмата и вистината да ја знае целиот свет. Ве молиме да ни се приклучите во борбата за вистината, ве молиме придружете ни се во тоа да не ја заборавиме“, вели таа во своето видео обраќање до македонската јавност.
