Киргистанскиот претседател Соронбај Женбеков поднесе оставка денеска по политичките превирања во државата.

– Не ја држам власта. Не сакам да останам во историјата на Киргистан како претседател кој пролеваше крв и пукаше кон сопствените граѓани. Затоа донесов одлука за оставка, нагласи Женбеков во изјавата.

Киргистан, земја со 6,5 милиони жители, сместена на границата со Кина, беше втурната во хаос по гласањето на 4 октомври, откако опозицијата обвини дека изборите биле нефер со купување гласови и со други нерегуларности.

Демонстранти потоа ги зазедоа владините згради, ограбувајќи некои канцеларии, а Централната изборна комисија ги поништи изборите. Женбеков воведе вонредна состојба во главниот град што беше одобрена во вторникот од парламентот.

Властите распоредија војници во Бишкек за време на викендот и воведоа полициски час. Овој потег ги намали тензиите во градот, но започнаа да формираат групи за заштита на имотот. Продавниците и банките кои беа затворени минатата недела повторно се отворија.