Кинезите со голема брзина се упатија кон веб-страниците на авиокомпаниите за да резервираат >патувања во странство откако Пекинг објави дека повторно ќе ги отвори своите граници од следниот месец, пренесува Би-Би-Си.

Апликациите за пасоши за кинеските граѓани кои сакаат да патуваат на меѓународно ниво ќе продолжат од 8 јануари, соопшти администрацијата за имиграција. Тоа следува по соопштението во понеделникот со кое завршија речиси тригодишните строги правила за карантин за оние кои пристигнуваат во земјата.

Веб-страниците на авиокомпаниите и туристичките агенции оттогаш објавија скок во посетеноста. Но, кинеските туристи нема да имаат неограничен пристап до сите земји.

Официјални лица во САД размислуваат за нови ограничувања за патниците од Кина поради загриженоста за порастот на случаите и недостатокот на транспарентност од кинеската влада.

„Постои зголемена загриженост во меѓународната заедница за тековните бранови на ковид-19 во Кина и недостатокот на транспарентни податоци, вклучително и податоци за вирусна геномска секвенца“, се вели во соопштението на американските власти цитирано од новинските агенции.

„Без овие податоци, за службениците во јавното здравство станува сè потешко да се осигураат дека ќе можат да ги идентификуваат сите потенцијални нови варијанти и да преземат брзи мерки за намалување на ширењето“ додаваат тие.

Јапонија – една од најпопуларните дестинации за кинеските патници – објави дека сите патници од Кина мора да покажат негативен ковид-тест при пристигнувањето или да бидат во карантин седум дена, поради порастот на случаите таму.

Индија, исто така, соопшти дека патниците од Кина (како и некои други земји) мора да покажат негативен ковид-тест кога ќе пристигнат – иако тоа беше најавено пред олеснувањето на ограничувањата од Пекинг.

Олеснувањето на правилата за патување во Кина доаѓа додека земјата се бори со нов бран инфекции. Незадоволството против политиката на владата – што предизвика ретки јавни протести против претседателот Си Џинпинг во ноември – доведе до олеснување на ограничувањата за ковид низ целата земја. Но, следеше зголемување на ковид-случаите, со извештаи за преоптоварени болници и недостиг на лекови.

Националната здравствена комисија на Кина објави дека ковид ќе биде формално намалена на заразна болест од класа Б на 8 јануари.

Пред олабавување на правилата за патување, луѓето беа силно обесхрабрени да патуваат во странство.

Во рок од половина час по известувањето дека границите на Кина повторно ќе се отворат, податоците од туристичката страница Трип.ком – цитирана во кинеските медиуми – покажаа дека пребарувањата за популарни дестинации се зголемиле десет пати од година во година.

Макао, Хонг Конг, Јапонија, Тајланд и Јужна Кореја беа најпопуларните дестинации.

Кинеските коцкари се „џекпот“ за казината во Азија