По оставките на дел од владините функционери од редовите на Алијанса за Албанците, лидерот на Беса, Биљал Касами, вели дека се работи за неколкумина индивидуалци, а останатите ќе продолжат да бидат дел од Владата и новоформираната партија Вреди.

Касами рече дека Алијанса е дел од коалицијата Вреди и во иднина ќе биде дел од истоимената заедничка партија.

„Една е Алијанса за Албанците, таа што е дел од коалицијата Вреди, има процедури од правен аспект кои се во судска постапка. Ние се надеваме дека тоа брзо ќе заврши во интерес на вистинската, да кажам, Алијанса за Албанците. Но, за нас важно е каде се гласачите на АА, а гласачите на Алијанса за Албанците се како дел од Вреди за тоа што беа важен чинител на победата во парламентарните избори. Од формален аспект, веќе е донесена одлука Вреди да стане политичка партија и политички субјект. Така да за нас е многу помалку важно, дали ги имаат печатите или не, за нас е важно гласачите на Алијанса да бидат таму кај што беа на последните парламентарни избори“, рече Касами по настан во Тетово.

Тој рече дека во тек се консултации со премиерот за тоа кој ги замени тие што поднесоа оставка во Владата.

„Овие денови ќе се знаат имињата на министри, заменик министри. За нас е тоа важен процес, затоа што министерството за здравство е многу важно министерство за да имаме резултати кои сме ги нуделе на граѓаните на последните парламентарни избори. Само индивидуи кои соработуваат на некој начин или форма со ДУИ не се добредојдени, но ние цениме дека Алијанса на Албанците и сите кои сакаат да останат во Алијанса на Албанците и следователно на тоа и на Вреди, се добредојдени“, рече Касами.

Од пратеничката група на Вреди претходно соопштија дека до денеска бројат девет члена, а во наредните денови, ќе им се приклучи уште еден. Со тоа, како што рече координаторот на пратеничката група на партијата Вреди, Беким Ќоку, со 10 члена се најголемата албанска пратеничка група во Собранието и дека можно е да стигнат до 14 члена.

Ќоку: Остануваме лојални и доследни на договорот, со 10 члена сме најголемата албанска пратеничка група