Кардиоваскуларните болести се водечка причина за смртност во светот, одземајќи околу 17,9 милиони животи секоја година, покажуваат податоците на Светската здравствена организација (СЗО). Имајќи ги предвид овие факти, важно е да знаеме кој е нашиот ризик. Можеби веќе знаеме некои од факторите кои можат да нè стават на зголемен ризик: висок холестерол, висок крвен притисок, дијабетес и седечки начин на живот.

Меѓутоа, постои уште еден фактор на ризик за кој многумина не се свесни, а тоа е високиот сооднос помеѓу половината и колковите. Нашиот сооднос помеѓу половината и колковите е споредба на нашиот обем на половината и обемот на колковите. Високите соодноси покажуваат дека околу средината на телото има повеќе маснотии, што се покажало како фактор на ризик за срцеви болести.

– Знаеме дека висцералните маснотии, односно мастите околу половината, се поврзани со зголемениот кардиоваскуларен ризик, вклучително и мозочниот и срцевиот удар, бидејќи се поврзани со зголемени фактори на ризик како што се високиот крвен притисок, дијабетесот и високиот холестерол – вели кардиоваскуларниот специјалист и кардиолог, д-р Лаура Верде, за „Парад“.

Освен тоа, кардиологот д-р Сам Сетарех тврди дека големиот обем на половината и високиот сооднос меѓу половината и колковите се фактори на ризик за срцеви болести. Тој укажал на научното соопштение на Американското здружение за срце во врска со поврзаноста на дебелината и кардиоваскуларните болести, во кое се нагласува дека обемот на половината е фактор на ризик.

– Обметот на половината не е само показател за смртност, туку е поврзан и со кардиоваскуларниот ризик поради висцералното масно ткиво, или висцералните масти, во абдоминалната празнина – објаснува д-р Сетарех.

Значи, за да дознаеме колкав е нашиот сооднос меѓу половината и колковите, д-р Верде вели да  користиме метар за мерење на обемот на половината. Метарот прво го обвиткуваме околу половината, а потоа околу колковите.

– Поделете го обемот на половината со обемот на колковите за да го добиете бројот на соодносот – објаснила докторката.

Се заклучува дека идеалниот сооднос помеѓу половината и колковите за мажи е 0,94 или помалку, а за жените 0,85 или помалку.