На свеченото отворање на Канскиот филмски фестивал на 14 мај, американската актерка Мерил Стрип (74) ќе добие почесна Златна палма, објави „Франс 24“.

Стрип е една од најпознатите актерки во историјата на Холивуд, со рекордни 21 номинација за Оскар и три освоени статуетки.

Нејзината кариера опфати низа модерни класици – од драми како „Ловец на елени“ („The Deer Hunter“), „Моја Африка“ („Out of Africa“) и „Крамер наспроти Крамер“ („Kramer vs. Kramer“, до омилените семејни филмови „ Ѓаволот носи Прада“ („Devil Wears Prada“) и „Мама Миа“ („Mamma Mia“).

Во Кан во 1989 година ја доби наградата за најдобра актерка во филмот „Плач во темнината“ („Evil Angels“).

„Мене ми е исклучителна чест што ја добив оваа престижна награда. Да се ​​добие награда во Кан, за меѓународната заедница на уметници, отсекогаш претставувала највисоко достигнување во филмската уметност“, рече Мерил Стрип.

Стрип ќе им се придружи на голем број холивудски ветерани, кои ќе се појават на годинашниот филмски фестивал во Кан на францускиот Азурен брег, вклучувајќи го и креаторот на „Војна на ѕвездите“  („Star Wars“) Џорџ Лукас, кој ќе добие и награда за животно дело на церемонијата на затворање во Кан.

„Кариерата на холивудската актерка трае речиси 50 години, време во кое се создадени многу филмски достигнувања и значајни улоги. Мерил Стрип е дел од нашата колективна имагинација, нашата заедничка љубов кон киното“, се вели во соопштението на организаторите на фестивалот.

Почесната Златна палма оди и во рацете на легендарниот јапонски анимациски колектив „Студио Гибли“, на јапонскиот режисер на анимирани филмови – Хајао Мијазаки. За првпат оваа награда ќе биде доделена на група, а не на поединец.

Канскиот фестивал ќе се одржи од 14 до 25 мај, а за Златната палма се натпреваруваат повеќе од 20 филмови.