Јувентус внимателно ги разгледува опциите за замена на Душан Влаховиќ, чие останување е сè пооддалечено бидејќи влегува во последната година од договорот, па затоа бројни имиња се споменуваат како потенцијални засилувања во нападот на италијанскиот фудбалски клуб.

Клубот од Торино планира да вложи 85 милиони евра за услугите на Виктор Осимен како замена за Влаховиќ.

Нигерискиот напаѓач, кој моментно игра за Галатасарај, постигна 24 голови во 27 лигашки натпревари, и иако Осимен има клаузула за откуп од 75 милиони евра во договорот со Наполи, Јувентус е подготвен да понуди повеќе за да го обезбеди неговото доаѓање.

Покрај Осимен, Јувентус ја следи и ситуацијата со Расмус Хејлунд од Манчестер јунајтед, како и Адемола Лукман од Аталанта, чија цена се проценува на околу 60.000.000 евра.

Клубот планира да ги обезбеди финансиските средства за овие трансфери преку квалификациите за Лигата на шампионите, што им донесе приход од 63.000.000 оваа сезона, меѓутоа, кога станува збор за потпишувањето на Осимен, конкуренцијата воопшто не е наивна.

Имено, за Нигериецот има интерес и од Ал Хилал од Саудиска Арабија, кои му нудат плата од 30.000.000 до 35.000.000 евра по сезона, но Јувентус се надева дека ќе го привлече во Торино со важна улога во тимот.