Македонската репрезентативка во карате, во дисциплината кати, Пулексенија Јованоска (28), ќе биде нашата претпоследна натпреварувачка што ќе настапи на Летните олимписки игри во Токио. Нејзиниот настап е закажан за в четврток наутро во 3 часот по македонско време. Во Нипон будокан салата во Токио, каде што се одржуваат мечевите во карате, тоа е 10.00 часот претпладне.

Јованоска до пласман на ЛОИ Токио стигна со вајлд-карта, а нејзиниот настап ќе биде прв за некој македонски натпреварувач или натпреварувачка во овој спорт на олимписки игри. Каратето на овие ЛОИ првпат е олимписки спорт во натпреварувачка конкуренција, но од идните Игри нема да биде тоа, па Јованоска уште долго време може да остане наша единствена претставничка во овој спорт со настап на олимписки игри. Пулексенија, најдобрата македонска каратистка во кати, вчера ни изјави дека е подготвена за она што ја очекува на настапот.

– Подготвена сум за настап. Сега веќе сѐ е одработено, завршени се подготовките, денеска ќе ми биде и последниот тренинг тука во Токио – вели Јованоска.

Таа има трема пред настапот, но како што вели, тоа е позитивна трема.

– Веќе почна да се појавува позитивна трема кај мене. Се чувствувам одлично. Условите за работа тука се извонредни. Имаме сала за тренинзи, тоа е најбитното и најпотребното. Веќе се навикнав на промената на времето и на климата. Сѐ е супер – ни изјави Јованоска.

Инаку, најголемиот успех на Јованоска, според нејзините изјави во медиумите, е самото учество на ЛОИ Токио 2020, иако во кариерата има и други забележителни резултати, меѓу кои е и бронзен медал од Европското првенство У21 во 2014 година во Лисабон.

Таа е горда што со самото учество во Токио се најде меѓу десетте најдобри каратистки во ката-натпреварувањата во светот и што во таква конкуренција ќе ја претставува Македонија. Тоа ѝ е награда за целиот труд и маки низ кои поминала за сите години во кои се занимава со овој спорт. Пулексенија со карате почна да се занимава на шестгодишна возраст. Последните четири години пред ЛОИ ѝ беа потполно посветени на обидот да обезбеди учество во Токио.

Што се однесува до другите наши претставници на овие ЛОИ, последен што ќе излезе на олимпиското борилиште во боите на Македонија е борачот Магомедгаџи Нуров, кој својот настап во категоријата до 97 килограми го има еден ден по Пулексенија.

Најголемиот успех Македонија го постигна по настапот на Дејан Георгиевски, кој освои сребрен медал во теквондо, што е оценето како највредниот резултат во македонскиот спорт по осамостојувањето. Македонија на овие игри има осуммина спортисти.