Во финалето на АТП Мастерсот во Синсинати, САД, италијанскиот тенисер Јаник Синер го победи Американецот Френсис Тиафое со 2:0 во сетови 7:6 (4) и 6:2.

И покрај повредата на колкот Италијанецот покажа дека е подготвен за претстојниот грен слем турнир САД опен кој ќе се организира од 26 август до 8 септември. Што се однесува до мечот, понеизвесен беше првиот сет. Се играше гем за гем до самиот крај, а тај-брејкот одлучуваше кој ќе поведе.

Синер на крајот успеа да дојде до дури три мини-брејка и со 7:4 да дојде до 1:0 во сетови. Веќе во вториот сет работите беа сосема поинакви. Синер веднаш доби брејк, а во петтиот гем доби уште еден и таму сè беше јасно. На крајот резултатот беше 7:6, 6:2.

Инаку, италијанскиот тенисер на тој начин дополнително му побегна на Новак Ѓоковиќ на АТП-листата и сега има вкупно 9.760 поени, дури 2.300 повеќе од српскиот тенисер.