Научните студии покажаа дека честото консумирање домати и производи од домати го намалува ризикот од рак на простата. Важноста на доматот за зачувување на здравјето на овој орган се огледува во присуството на ликопен. Тоа е црвен пигмент кој се концентрира веднаш под тенката лушпа на доматот. Колку е поголема концентрацијата на ликопен во крвната плазма, толку е помал ризикот од појава на болеста. Ликопенот ги ублажува воспалителните процеси, делува како антиоксиданс и го намалува малигното размножување на клетките на простатата, пишува „Живим“.

Со варењето, биолошката активност на ликопенот станува поизразена. Некој би се запрашал дали е корисно да се зема ликопен како додаток во исхраната. Како одговор може да послужи податокот дека покрај ликопенот, во доматот се присутни и многу други активни компоненти кои синергично дејствуваат на ликопенот, заемно потпомагајќи го неговото дејство. Меѓу нив се бројни фитохемикалии – гликоалкалоиди, феноли, салицилати, други каротеноиди итн. Салицилатите делуваат против воспаленија, а кверцетинот спречува појава на рак.

Што уште треба да биде на менито?

Сето ова ја потврдува супериорноста на квалитетните намирници во однос на додатоците во исхраната. Освен доматите, здравјето на простатата го штитат гравот, леќата, грашокот, сувото грозје, урмите и друго суво овошје. Не треба да се заборават ниту семките од тиква, за кои е докажано дека имаат позитивно дејство врз здравјето на простатата.

Две важни функции

Според податоците на Светската здравствена организација, седум од десет мажи не знаат каде се наоѓа простатата и која е нејзината функција. А таа има две важни улоги – помага во контролата на мокрењето и за време на сексуалната активност излачува белузлав секрет кој го сочинува ејакулатот, а тој ја подобрува оплодната способност, конкретно подвижноста, преживувањето на сперматозоидите и нивниот транспорт во машкиот и женскиот репродуктивен систем.

Со текот на годините, ризикот од проблеми со простатата се зголемува, но доколку симптомите се препознаат навреме, нема причина за страв бидејќи постојат решенија. Повеќето мажи обрнуваат внимание на простатата дури кога ќе почувствуваат проблеми со мокрењето, но редовните прегледи се добра превенција.

Симптоми кои укажуваат на зголемена простата:

• Често мокрење, особено ноќе (2-3 пати)
• Забавено или одложено мокрење
• Неможност за целосно празнење на мочниот меур
• Слаб и/или прекинат млаз
• Капење на урина на крајот од мокрењето (трае неколку секунди, знак дека дел од мочниот меур – детрузорот – веќе не може да задржи силен млаз)
• Болка при мокрење
• Силен и изненаден нагон за мокрење (ургентно мокрење)
• Неконтролирано истекување на урина (инконтиненција).