Калин Ивановски успеа да се пласира на главниот турнир на ИТФ М15 Опатија, Хрватска што се игра за награден фонд од 15.000 долари. Македонскиот тенисер по трите победи во квалификациите ќе ги продолжи мечевите.

Најголе проблем за Ивановски, како и за организаторот и за другите тенисери беше дождот, поради кој предвидената програма имаше многу измени, па така денеска имаше два меча.

За пласман на главниот турнир во финалето од квалификациите го совлада Грегор Рамскоглер (трет носител) од Австрија со 2:0 во сетови 6:3, 6:4, а во првиот денешен меч во втората рунда од квалификациите го надигра Ахилес Белкович од Унгарија со 6:1, 6:3.

Најтешкиот противник Ивановски го имаше во првата рунда квалификации кога по голема борба го совлада Макс Батуенко од Украина со 7:6 (1), 3:6 и 10:8 на поени во решавачкиот сет.

Ивановски го очекува противникот во првото коло, а мечот ќе се игра утре. Нашиот тенисер претходната недела имаше настап на Челинџер трурнирот во Задар.

Горазд Србљак пак настапи во квалификациите на фјучрсот во Аламинос што се игра за награден фонд од 15.000 долари. Србљак денеска во финалето од квалификациите загуби од Никола Парициа од Швајцарија со 6:3, 6:2, додека во првата рунда го совлада Маркос Јаковидес од Кипар со 6:3, 6:2.