Да се ​​биде родител не е лесна работа. Одгледувањето убави, но живи мали суштества, балансирањето на работата, домаќинството и секојдневните обврски може да биде исцрпувачки за многумина. Ако се самохрани родители, товарот е уште поголем. И додека повеќето го сфаќаат како неизбежен дел од животот, во Германија ги препознаа проблемите на родителите. Во таа земја одамна постои „Кјур“ (Cur), програма врз основа на која родителите со упат од лекар можат да одат на одмор во бањата, на море или на планина, во времетраење од четири недели, јавува „Си-ен-ен“.

Програмата „Кјур“ буквално значи „лек“, а нејзината историја датира од ерата по Втората светска војна. Тогаш е основан Müttergenesungswerk ( MGW ), што во груб превод значи институт за благосостојба на мајките. Добротворната организација беше формирана за да им помогне на жените да се справат со мајчинството, работата и животот да се вратат во нормала по војната, кога многу татковци не се вратија дома. Организацијата постои и денес и родителите можат да летуваат преку неа или преку сопственото здравствено осигурување.

Иако првично била замислена како превентивна програма, која ќе ги спречи родителите да се исцрпат, денес повеќе се користи за санирање на штетите, односно за обновување. За да добијат рецепт или упат за „Кјур“, родителите мора да покажат симптоми како што се раздразливост, замор, несоница и чувство на преоптоварување. Лекарите потоа препишуваат некои од бањите и третманите што ги имаат за да спречат натамошно влошување на здравствената состојба. Во оваа програма се вклучени бројни германски бањи, од кои многу се под заштита на УНЕСКО.