Тим на новинари од ИРЛ од Македонија и Штег од Албанија – членки на Меѓународниот проект за известување на организиран криминал и корупција (ОЦЦРП), повеќе од десет месеци работеше на првото од серијата истражувања посветени на трговијата со влијание во регионот. Новинарите собраа и анализираа над 3.800 документи, а наодите од истражувањата покажаа како владите на Македонија и Албанија преку државно-спонзорирани зделки им овозможиле на лица со влијание да профитираат на сметка на обичниот граѓанин.

Ова е прв прекуграничен проект за известување за организиран криминал и корупција помеѓу двете држави.

– Сакаме да покажеме како одложениот развој поради криминал, негрижа и корупција влијае поразително врз животите на граѓаните. Преку ваквите истражувања коишто не можат да се сретнат во меинстрим медиумите во двете земји сакаме да ги поттикнеме граѓаните да се борат против заедничкиот непријател на вистинскиот прогрес – корупцијата – вели Сашка Цветковска, главен и одговорен уредник на проектот и коосновач на ИРЛ.

Таа додава дека била формирана специјална коалиција од уредници и наградувани истражувачки новинари и репортери од Македонија, Албанија и САД, чија примарна задача во првото истражување била да ја истражуваат високата корупција која ѝ овозможи на урбаната мафија со децении да профитира на сметка на обичните граѓани.

„Следува долга и ангажирана прекугранична работа, а до крајот на годината ќе се објави и првиот истражувачки прекуграничен документарен филм којшто ќе има свои јавни проекции во Тирана и Скопје“ – велат од ИРЛ.

ИРЛ и Штег се непрофитни медиумски организации чиишто известувања се фокусирани на корупција, криминал и добро владеење.