Македонскиот олимписки комитет (МОК) потврди дека Пулексенија Јованоска ќе биде меѓу спортистите кои ќе ја претставуваат нашата земја на Летните олимписки игри во Токио (23 јули – 8 август 2021 година).

Членот на Карате федерацијата на Македонија ја доби довербата од МОК и Интернационалниот олимписки комитет и доби покана за учество на Олимпијадата во дисциплината Кати.

Прогласена за најдобра спортистка на годината (2019), сите овие години со сиот труд, сета љубов и срце бранејќи ги боите на Македонија, на крајот навистина напорната работа секогаш се исплаќа.

Со довербата од МОК и ИОК и член на Карате федерацијата на Македонија ќе се натпреварувате во дисциплината Кати, што значи за вас овој важен момент и овој најмасовен спортски настан кој ќе се одржи во Токио?

– Олимпијада! Самиот збор носи тежина. Сон на секој спортист. Да бидеш меѓу елитата на спортот. Заедно со сите светски имиња. Пред сè голем предизвик. За мене како спортистка со резултати во континуитет ова некако ќе ги заокружи сите макотрпни години, сите неправди од спортот. И секако носам одговорност за луѓето кои веруваа во мене и ми ја дадоа ова шанса, тимот на олимпискиот комитет.

Како почна љубовта кон каратето, што ве инспирираше да бидете дел од таа боречка вештина?

– Љубовта кон каратето ја имав од најмала возраст, на мои шест години за првпат се појавив на тренинг. Од тогаш до денес јас останав во тој спорт. Љубопитноста за тоа што е карате, што претставува одбрана, а во исто време почит и хиерархија. Преку карате учев, растев и се развивав. Каратето нè учи за психофизички раст преку победи и порази, преку неправди. Од карате научив како е да победуваш, да губиш и да продолжиш напред. Научив за истрајност, за верба во себе, верба дека напорната работа секогаш се исплаќа. Инспирацијата ја црпев од предизвиците дека секогаш можеш ниво повеќе. Започнав од жолт појас. А денес зборувам за Олимпијада:).

Кои се вашите најдраги успеси од домашните и меѓународните турнири на кои сте настапиле?

– Буквално не можам да издвојам, секој резултат и признание носи посебна „тежина“ своја приказна. Сè во свое време. Особено драг ми е првиот и сè уште единствен ЕВРОПСКИ историски медал за дисциплината Кати – у21 во 2014 година. Двапати петтопласирана на Европските првенства, нешто што нашата земја немала ни блиску таков резултат, во 2016 и 2019 година. Потоа, моментот кога станав Балкански шампион, мојот прв медал од Светски Куп, првиот резултат на Премиер Лига. Европските медали кои ги освојував како студент, првиот Медитерански резултат, навистина се премногу.

Како моментално течат подготовките и кои се вашите идни цели кои сакате да ги остварите во иднина?

– Подготовките се одлични. Од моментот кога официјално добив покана јас не застанав. Се направи план за работа од страна на мојот селектор и тренер Стојан Андриевски и кондициониот тренер Златко Јанакиевски. Се прецизираа датуми, се направи план за подигнување на формата и завршна фаза од подготовки.
Веќе почетокот на јули заминувам и на припреми во Словачка каде што ќе работам со експерти за техничка подготовка, со тренер од Словачка – Кристина Мачкова.

Која е вашата најголема поддршка на патот кон успесите?

– Моја најголема поддршка се секако моите најблиски, фамилијата која што секогаш ме испраќа и дочекува без обзир на тоа каков е резултатот. Во најголема поддршка исто сакам да се заблагодарам на еден човек кој што беше иницијатор да останам во каратето со целокупното негово залагање и оддавање за нас каратистите. Драган Стојановски – човекот што пред четири години кога ја потпишав Олимписката стипендија ми рече: „Наши историја Пулексенија како прва жена од Дисциплина Кати“. Не можам, а да не ја спомнам поддршката која што ја добив од Олимпискиот Комитет, нивната посветеност на спортот и спортистите. Правилниот начин на соработка и моралната и етичка. Поддршка која што ја пружат на сите нас. Во овие моменти навистина сум благодарна и за поддршката што ја добив од Агенцијата за Млади и Спорт и Директорот Наумче Мојсоски. И секако карате федерацијата која што сите овие години беше главен столб за сите натпреварувања.

Што треба да го краси еден каратист, воопшто спортист за да може да се надева и верува во добар резултат?

– Да се биде успешен спортист е привилегија на најдобрите. Поим за дисциплина, упорност и истрајност. Да биде човек – лав. И кога е најтешко да остане да се бори. Но, пред сè да е добар човек. Да посакува и да се радува на туѓ успех. Само со чисто срце и вистинска посветеност може да очекуваме резултат.