Деветте жаришта на биолошка разновидност на брегот на Охридското Езеро се поклопуваат со најжешките точки на урбанизацијата и трансформација на нашето највредно природно богатство заштитено од УНЕСКО. Ова го покажаа наодите на граѓанското здружение Фронт 21/42 во врска со спроведување на препораките на УНЕСКО за Охридскиот Регион. Од Фронт 21/42 апелираат итно да се стопира секаква натамошна урбана и крајбрежна трансформација. Бернската Конвенција неодамна објави дека ќе отвори случај за уништување на Охридското езеро и Галичица, по жалбата поднесена од Фронт 21/42.

„Реактивната мониторинг мисија на УНЕСКО лани укажа дека тековните и планираните трансформации ја забрзуваат оваа веќе ранлива состојба до точка од која нема враќање. За нас е запрепастувачко тоа што локалните и централните власти продолжуваат по патот до точката на неповрат, целосно свесни за исходот“, вели за „Слободен печат“ Ања Јованова од Фронт 21/42 .

Од Фронт 21/42 појаснуваат дека зад сите црвени точки и линии на мапата стојат конкретни планови и проекти за градби врз или во непосредна близина на жариштата на биолошка разновидност и се во различни фази на реализација.

„Податоците за најголемиот дел се превземени од јавно објавените службени гласници и разни официјални објави на локалната власт, дел се мапирани врз основа на јавните објави на државните институции, а неколку се мапирани по увидот на терен“, додава Јовановска.

На интерактивната мапа која ја изработи „Слободен печат“ погледнете ги жариштата кои ги мапира Фронт 21/42.