Инспекција од Министерството за социјална политика пред две недели влегла во домот за стари лица „Арија“ во Скопје и извршила вонреден инспекциски надзор отако добиле вонредна претставка од граѓанин, потврдуваат оттаму за „Слободен печат“. Инспекторите нашле неправилности и на домот му дале рок да ги отстрани. Меѓутоа, утврдиле наводи при инспекцискиот надзор кои не се во нивна, туку во надлежност на МВР и на финансиската полиција.

За извршениот инспекциски надзор изготвен е записник со констатирани неправилности и донесено е решение со определени мерки и рокови за нивно отстранување.

Околу утврдените наводи при инспекцискиот надзор кои не се во надлежност на Секторот за инспекциски надзор од областа на социјална заштита на децата при Министерството за социјална политика, демографија и млади, известени се надлежните служби, односно пратен е допис до Министерство за внатрешни работи, Управата за финансиска полиција и Државен санитарен и здравствен инспекторат, велат од Министерството за „Слободен печат“.