Мелинда Гејтс во своите мемоари „Следниот ден“ (The Next Day) открива дека сфатила оти нејзиниот брак со Бил Гејтс е во криза откако јавноста дознала за неговото неверство и пријателство со Џефри Епстин во 2019 година. Напишала дека почнала да има ноќни мори и брзо сфатила дека тие се поврзани со нејзиниот брак.

„Во тој октомври работите кулминираа кога ‘Њујорк тајмс’ објави вознемирувачки напис што покрена сериозни прашања за однесувањето на Бил, прашања кои сугерираа дека не го предал само нашиот брак, туку и моите вредности“, навела таа.

Мелинда се повикува на пријателството меѓу нејзиниот поранешен сопруг и Епстин, осуден сексуален престапник кој почина во 2019 година додека чекаше судење за трговија со луѓе со цел сексуална експлоатација и федерални обвиненија.

Угледниот весник тогаш објави дека Гејтс се сретнал со Епстин повеќе пати, а една од посетите траела неколку часа. За нивното пријателство и првата средба претходно зборуваше и основачот на „Мајкрософт“. „Неговиот животен стил беше многу различен и на некој начин интригантен, иако не ми одговараше“, напишал Гејтс во 2011 година до своите колеги, откако за првпат се сретнал со озлогласениот Епстин. Истата година признал дека било „голема грешка“ што се поврзал со него.

„Гледајќи наназад, бев глуп што поминував време со него. Мислам дека бев прилично глуп. Мислев дека тоа ќе ми помогне со глобалната здравствена филантропија. Всушност, не ми помогна. Тоа беше голема грешка“, изјави тој.

„Њујорк тајмс“ тогаш тврдеше и дека Епстин му се заканувал на Гејтс дека ќе ја открие неговата афера со Русинката Мила Антоновa од 2017 година, затоа што Гејтс одбил да му се приклучи на неговиот добротворен фонд во соработка со банкарскиот гигант „ЏП Морган Чејс“. Гејтс, кој беше во брак со Мелинда од 1994 до 2021 година, наводно со години имал афера со Антонова.

Мелинда во својата нова книга напишала дека разводот бил една од најтешките и најважни работи што некогаш ги направила.

За пријателството на Гејтс и Епстин, Мелинда зборуваше и во интервју во 2022 година.

„Не ми се допаѓаше тоа што се среќаваше со Џефри Епстин. Тоа му го кажав директно“, истакна таа, додавајќи дека лично го запознала Епстин само за да види кој е.

„Се покајав штом влегов низ врата. Беше одвратен. Олицетворено зло. Срцето ми се кине за тие жени“, порача таа.