Издавачката куќа „Артконект“ ја објави познатата илустрирана книга „Северозападниот ветер“ од Зденко Башиќ. За оваа книга авторот ја има добиено наградата „Киклоп: книга на годината за деца и млади“.

Книгата „Северозападниот ветер“ содржи илустрации што се поттикнати од места што авторот ги открил во своето детство и од фолклорни ликови на кои го насочиле неговите баби, сеќавајќи се и раскажувајќи му ги овие заборавени приказни.

Читателот во оваа книга ќе сретне приказни за виленици, самовили со опојна убавина, водени луѓе, суштества со големи екстремитети, со долги коси замрсени од ветерот и пламени очи – цела низа суштества, кои читателот, без оглед на возраста, веднаш ги препознава затоа што се дел од колективното несвесно, од заедничката традиција што го обединува човештвото преку неговата имагинација.

Зденко Башиќ е роден 1980 година во Загреб. Дипломирал на Катедрата за анимиран филм и нови медиуми на Академијата за ликовни уметности во Загреб. Покрај со анимиран филм, се занимава и со илустрација, па досега илустрирал неколку книги за деца, меѓу кои и најновите изданија на бајките на Андерсен и на Грим. Добитник е на повеќе награди за илустрација.

Оваа книга е објавена во рамки на проектот „Соочување со неизвесноста: современа европска литература“ што издавачката куќа „Артконект“ го реализира со поддршка на програмата „Креативна Европа“ на ЕУ. Преводот е на Владимир Јанковски.

(Текстот е објавен во „Културен печат“ број 255, во печатеното издание на весникот „Слободен печат“ на 9-10.11.2024)