После високиот пораз од Франција на стартот од групата „Ц“ во прелиминарната фаза на Европското првенство, денеска македонската женска ракометна репрезентација загуби уште поубедливо овојпат од Холандија со 30:15.

„Лалињата“ покажаа зошто нивниот ракомет е во огромен подем, и дека годинава се исто така едни од фаворитите за медал. За нашата селекција предводена од Љубомир Савевски останува последната шанса на 9 ноември против Романија, меч кој најверојатно ќе одлучува за третото место кое води во главната фаза.

Уште на самиот почеток противникот стекна убава предност од 6:1 по седум минути игра во СЦ „Борис Трајковски“ – Скопје. Врзавме два голови во серија преку Кипријановска и Ристовска за намалување на 6:3, но тоа не ја загрижи холандската селекција која брзо и едноставно ги реализираше своите напади, возврати уште подобро и дојде до „плус седум“ (11:4) во 13 минута.

Противникот сигурно го одржуваше водството, а на пауза замина со највисоки 17:9 по погодокот на Смитс. Ништо не се промени во вториот дел, Холанѓанките само рутински ја одработуваа задачата, а ние влеговме во уште поголема криза откако 15 минути бевме без реализација. Тоа го искористи Холандија да дојде и до двоцифрена позитива и истата уште повеќе да расте до крајот на мечот.

За Македонија на денешниот дуел најефикасна беше Ристовска со четири голови, играчот на ЦСКА Москва беше прогласена и за најдобра ракометарка на натпреварот. На спротивната страна Смитс седумпати се запиша во листата на стрелците, а шест голови беа дело на Бонт.