Јеменската бунтовничка група Хути се заканија дека ќе ги нападнат американските нафтени гиганти, вклучувајќи ги „Ексмобил“ и „Шеврон“, и покрај претходниот договор со администрацијата на американскиот претседател Доналд Трамп да не се напаѓаат бродови поврзани со САД што пловат низ Црвеното Море.

Хуманитарно-координативниот центар за операции со седиште во Сана, кој координира меѓу Хутите и комерцијалните поморски оператори, соопшти дека санкционирани се 13 американски компании, девет директори и два брода, објави Ројтерс.

Со субјектите означени од Хутите ќе се постапува во согласност со принципот на конфронтација, соопшти на својата веб-страница Хуманитарно-координативниот центар за операции.

Се вели дека станува збор за предупредување дека наведените компании, вклучувајќи ги „КонокоФилипс“ и „Дајмонд С Шипинг“, се сметаат за непријателски субјекти кои би можеле да бидат изложени на напад.

Од 2023 година, Хутите започнаа бројни напади врз бродови во Црвеното Море за кои сметаат дека се поврзани со Израел, тврдејќи дека се во солидарност со Палестинците изложени на израелски напади во Појасот Газа.