Гостин на издавачката куќа „Илика“ на 23 и 24 јуни беше холандскиот писател Арнон Грунберг, кој во Скопје го претстави романот „Тирза“. Најпрво на 23 јуни, во „Јуроп хаус Скопје“, се одржа читачки кружок, каде што се зборуваше за сите нишки што романот ги крие во себе, како и за процесот и идеите зад приказната.

Промоцијата на романот „Тирза“ се одржа на 24 јуни во КСП „Центар-Јадро“ во Скопје. Романот беше промовиран низ разговор меѓу Арнон Грунберг и македонскиот поет и преведувач Александар Маџаровски.

Приказната во „Тирза“ го следи Јерген Хофместер, кој има уредна работа во издавачка куќа, милионска заштеда, мирен семеен живот и го чека денот кога ќе се пензионира. Неговите денови се лежерни и спокојни и тој се гордее со фактот дека спие мирно како бебе – освен понекогаш, кога се прашува дали е, всушност, чудовиште.

Арнон Грунберг е роден во Амстердам во 1971 година. Работи како издавач, новинар и писател, а живее во Њујорк. За својот прв роман „Син понеделник“, издаден во 2000 година, добил награда за најдобра дебитантска книга во Холандија. Оттогаш има напишано и објавено триесетина книги.

(Текстот е објавен во „Културен печат“ број 287, во печатеното издание на весникот „Слободен печат“ на 28-29.6.2025)