Холандија почна да вакцинира кокошки, но птичјиот грип не може да се искорени, велат научниците
Холандија започнува двегодишен пробен период за администрирање на вакцина против птичји грип на живинарска фарма, објавија холандските медиуми.
Препорачано
Министерката за земјоделство Фемке Виерсма, како и целиот живинарски сектор, има големи очекувања од вакцината, пишуваат медиумите.
– Никогаш не можете целосно да го елиминирате птичјиот грип. Овој вирус главно се наоѓа кај дивите птици, но тие го пренесуваат низ целиот свет. Вакцинацијата на живината може да обезбеди епидемиите на птичји грип да бидат поретки во иднина, рече Виерсма, додавајќи дека ова е пилот проект и прв чекор кон масовна вакцинација.
Овој експеримент следеше по тестовите минатата година кои покажаа дека два вида вакцини се ефикасни во заштитата на птиците од вирусот.
Двегодишно тестирање за вакцинација ќе биде спроведено на живинарска фарма која произведува јајца само за холандскиот пазар. Вакцината ќе се дава на кокошки кои ќе прераснат во кокошки несилки. Минатата година се разгледуваше можноста во овој проект да учествуваат повеќе живинарски фарми, но холандската влада сепак се одлучи само за една.
Кис де Јонг, претставник на организацијата „Avined“, која обединува различни трговски здруженија, рече дека развојот на вакцината траел толку долго токму поради загриженоста за безбедноста на храната.
– До неодамна единствено решение беше да се убиваат болни кокошки, а сега ќе ги заштитиме – рече тој. Според него, искоренувањето на птичјиот грип е илузија, но на овој начин ќе може да се контролира.
Да потсетиме дека Франција беше првата земја во Европа која во 2023 година објави дека ќе ја вакцинира живината против оваа болест. Според планот, вакцините прво биле дадени на патки и гуски од чијшто џигер се прави познатиот специјалитет од паштета – „фоа гра“, еден од симболите на француската гастрономија и наследство, наменет за потрошувачите со подлабок џеб. Намерата беше и да се вакцинира живината на слободно и на отворено.
Во 2022 година птичјиот грип беше една од главните причини за нарушување на пазарот на живинско месо и јајца и поскапувања, што во моментов се случува и во Европа, каде што се забележани енормни поскапувања, а на кризата не и се гледа крај. Повеќе од 50 милиони живина угинаа пред три години во Европа поради заканата од птичји грип и уништувањето на дивите и домашните птици. Многу фарми се затворени или претрпеа голема економска штета. Високите нивоа на болести кај дивите птици доведуваат до зголемување на случаите на комерцијалните фарми.
