Холандија му забрани влез на Дејвид Ајк, кој тврди дека со човештвото управува тајно друштво гуштери
Холандската Влада му забрани на британскиот теоретичар на заговори, Дејвид Ајк, влез во земјата и во шенген-зоната на две години, поради стравувања дека неговото присуство може да го „наруши јавниот ред и мир“, јавува АФП.
Ајк на својата веб-страница објави писмо што вчера му било доставено од холандската Служба за имиграција, во име на државниот секретар за правда и безбедност, Ерик Ван дер Бург, со коментар дека се работи за забрана изречена од „фашистичкиот холандски режим“.
Ајк е поранешен професионален фудбалер и телевизиски водител кој тврди дека со светот владеат рептили. Беше предвидено тој да зборува на протест во Амстердам против војната во Украина, холандската Влада и зголемувањето на цените на енергенсите.
Полицијата во Амстердам стравува дека ќе дојде до немири, дури и доколку Ајк се обрати и преку видео-врска.
„Со ова писмо Ве известувам дека на две години сте означени во Шенгенскиот информациски систем и дека не Ви е дозволен влез во Шенген-зоната“, се наведува во писмото, во кое уште се посочува дека Ајк „со години е меѓународно признаен како промотор на теории на заговор“.
Според холандските власти, присуството на Ајк „би можело да доведе до немири во Холандија, во време на насилства и растечки закани по политичарите“. Ова е вторпат властите во Хаг да воведуваат таква мерка, по забраната изречена во 2019 година за Стивен Андерсон, американскиот проповедник кој отворено се изјасни за ликвидација на хомосексуалците.