Зошто Владата неодамна му го продолжи договорот на концесионерот за уште три години ако навистина се преиспитува изградбата на малите хидроцентрали во Жировница, прашуваат активистите од Еко-свест, по изјавата на премиерот Зоран Заев дека нема поважно од здравјето на граѓаните, по цена Владата да има буџетски реперкусии и да плаќа казни со евентуално раскинување на договорите со концесионерот.  Инвеститор на овие хидроцентрали е „Хидроген енерџи груп“, фирма блиска до екс-вицепремиерот Кочо Анѓушев.

Екологистите кои се спротивставуваат на изградбата на малите хидроцентрали во земјава му порачаа на Заев да ја преиспита поддршката на овие проекти и го поканија на терен самиот да се увери во нивното негативно влијание врз природата.

– Очигледно ниту вие, ниту вашите советници на темата енергетика и животна средина не сте го прочитале дописот кој „Еко-свест“ и Македонското еколошко друштво ви го испратија во декември 2020 година, со кој се предупредува на штетите од овие мали хидроцентрали поради зафатите на речните корита и крајречната вегетација и живиот свет кои се под постојан ризик од изумирање – вели Ана Чоловиќ Лешовска, претседателка на еколошкото друштво „Еко свест“.

Според Чоловиќ, изградбата на мали хидроцентрали и нивните пристапни патишта создаваат појави на ерозија и лизгање на земјиштето, овозможува криволов, дива сеча, вознемирување на дивиот свет и изградба на цврсти објекти во подрачја што одамна се планирани за заштита.

На прес конференција во Владата на оваа тема, премиерот Заев изјави дека ги смета малите хидроцентрали за најеколошки извор на енергија.

– Од она што јас го имам читано и што сум поучен од советниците е дека малите хидроцентрали се ако не најеколошките извори на енергија, тогаш едни од најеколошките извори на енергија поради тоа што се обезбедува биодиверзитетот преку паралелно обезбедување на рибниот фонд и протокот на реките, дополнително се враќа секогаш во првобитна состојба, водата само ја врти турбината и продолжува понатаму во целиот свој тек и сакам да охрабрам позитивен аспект на гледање на малите хидроцентрали, но секако и максимално почитување на законите – појасни Заев во одговор на новинарско прашање дали ќе се преиспита дозволата за хидроцентралата на Лешница, за која има поплаки од месното население.

Од „Еко свест“ го потсетуваат премиерот дека во програмата на Владата пишува, и тоа двапати, дека ќе се „воведе забрана за изградба на мали хидроцентрали во заштитени подрачја и национални паркови“.

Според премиерот, ќе се прават и дополнителни анализи да се процени кои би биле последиците по буџетот ако Владата треба да им плаќа отштета на инвеститорите.

„Фронт 21/42″: Драматичната експанзија на мали хидроцентрали се заканува трајно да ги уништи нашите реки

Мали хидроцентрали навалија на Шар Планина

РЕПОРТАЖА Лешница, бисерот на Шар Планина, загрозена од малите хидроцентрали и од несовесните посетители

WWF: Мини хидроцентралите не се ефикасни, сите губиме градејќи ги

Концесијата на Мала Река кај Градче е дадена без да ги прашаат граѓаните

Мали хидроцентрали навалија на Шар Планина