Заеднички служби планираат да ја сменат компресорската станица на Клинички центар до Нова година. Фактот што треба да се смени целата компресорска станица за да можат да работат хируршките сали без надворешни компресори, го отвори прашањето – што ќе значи за пациентите ова чекање?

Има долг план за тоа како ќе се менува компресорската станица со точно утврдени рокови. За дваесетина денови неработење, одложени беа повеќе од 2.000 операции на Клинички центар, а се оперираа само мал дел итни пациенти. Затоа, граѓаните што немаа итни интервенции, но не сакаа да го доведуваат во ризик своето здравје уште чекаат или се упатуваат во приватните клиники.

Во ГОБ „8 Септември“ и во Клиниката за хируршки болести „Св. Наум Охридски“ и понатаму се работи со максимално темпо. Директорот на ГОБ „8 Септември“, доктор Христијан Костов вели дека сепак, некои операции што може да почекаат, се одложуваат за да има капацитет.

Дел од операционите сали се оспособени на Клинички центар со надворешни компресори, ама не сите и не со целосен капацитет. Тоа ја зголемува листата на чекање, а здравствениот персонал треба да користи и годишен одмор, па пациентите се во незавидна состојба. „Слободен печат“ очекува одговор од Министерството за здравство за бројот на изведени и одложени хируршки интервенции.

Дали во период кога две илјади пациенти чекаат за операција, треба на помош да „притрча“ приватното здравство?

Во интервју за „Слободен печат“ доц. д-р Александар Ѓорески од приватната болница „Систина“ вели дека на утрински состанок забележале зголемување на бројот на граѓани што бараат операција, но капацитетите се лимитирани во поглед на тоа што има само определен број на операциони сали и кревети.

Според Ѓорески, добра идеја за решавање на напливот во државното здравство е истото да се спои на некој начин со приватното, барем за базичните, основни услуги. Секој дополнителен луксуз во приватните болници како подобрата храна или некои работи што излегуваат од спектарот на интервенцијата пациентот да ги плаќа од сопствениот џеб, но основната скапа интервенција да биде покриена од државата.

Докторот смета дека проблемот е во тоа што Македонија е сиромашна држава, со недоволно средства коишто се одделуваат за здравството.

– Не можам да си објаснам како може во една терциерна здравствена установа во исто време неколку операциони сали да не работат, но тоа прашање ќе го оставам на страна. Здравството е загубар. Здравството треба да ги лекува луѓето без притоа да мисли на трошоците. Не да се расфрламе. Секоја власт мора да одвојува повеќе средства во здравствениот систем.

Како може да се подобри здравството за луѓето и животниот век? Мое лично гледиште е некако да има спојување на приватното и јавното здравство. Јавно приватно партнерство е спасот и треба на некој начин да го копираме бугарскиот здравствен систем.  Во Софија има повеќе приватни клиники отколку во Скопје, но сите се некако инкорпорирани во јавниот здравствен систем. Тоа значи пациент со државно здравствено осигурување (не приватно) може да се лекува и во приватна болница за одредени услуги кои ги нема во јавното здравство. Но, базата за таа услуга ја покрива државата, изјави во интервју за „Слободен печат“ доктор Ѓорески.

Тој додава дека за интервенциите за кои се потребни скапи потрошни материјали кои ги нема во јавното здравство државата мора без пардон да ги покрие тие средства за пациентите.

– Сè додека не се инкорпорира приватното во јавното здравство, пациентите ќе чекаат по ходници и за жал нема да го дочекуваат денот на својата операција. Салите не смеат да не работат толку долго, за тоа нема дискусија, вели тој.

Компресорската станица на Клинички центар е дотраена, но има барем иницијален план како ќе тече нејзината обнова од страна на заеднички служби. Целосната замена ќе чини половина милион евра. Во рок од пет дена ќе се бара согласност од универзитетските клиники да се вклучат во групна набавка и да здружат средства.

Наредните 7 дена ќе се подготви тендерската документација и ќе се објави оглас. Минималниот временски рок за поднесување понуди, преку отворена постапка со скратени рокови е 20 дена. Евалуацијата на понудите и одлуката која е најповолната понуда ќе одземат дополнителна недела од времето. Тие добавувачи што нема да бидат избрани ќе имаат 10 дена рок за жалба.

Потоа ќе следува набавка, монтажа и пуштање во работа на потстаница за компримиран воздух и тоа 3 компресори со сета потребна придружна опрема (резервоари, циклонски сепаратор за отстранување на влага и масло на излезен степен од компресор и друга пропратна опрема) согласно европска фармакопеја, изработена согласно европска директива.
Додека се чека испораката на опремата од Заеднички служби планираат да ја заменат електричната инсталација и да извршат адаптација на постоечкиот објект.

Ќе се врши ископ на земја, бетонирање на подземен канал, сечење улици и други градежни работи и враќање на земјиштето во првобитна состојба. Ќе се изврши набавка, замена и монтажа на бакарен цевен развод, приклучни места и разводни ормари за компримиран воздух за снабдување на Операциониот блок од 12 сали, 4 сали на ортопедија, 2 сали на Неврохирургија, 2 сали на Пластична хирургија и за тоа ќе бидат потребни од 90 до 120 дена, изјавија од Заеднички служби за „Слободен печат“.

Оптимистичкиот рок за извршување на горенаведените активности е 5 месеци, а реалниот рок е 6 месеци.