Клупската сезона е зад нас, а претстојат деновите за македонските одбојкарски репрезентации. Машката одбојкарска сениорска репрезентација на Македонија повторно ќе настапи во елитното европско натпреварување – Европската златна лига на ЦЕВ, која годинава прв пат ќе се игра според системот на Лигата на нации на ФИВБ.

Нашите најдобри одбојкари во Европската златна лига на ЦЕВ ќе играат против Естонија, Чешка, Белгија, Азербејџан, Шпанија и Хрватска, а првиот од трите турнири ќе биде одигран во Струмица од 17 до 19 мај.

Нов селектор на најдобрите македонски одбојкари е Хари Наковски, а во стручниот штаб ќе остане досегашниот кормилар, Јошко Миленкоски.

– Голема благодарност до Одбојкарската федерација на Македонија за укажаната чест да бидам селектор на оваа сениорска репрезентација што е голем предизвик и се надевам дека ќе ја оправдам довербата на федерацијата. Ја преземам „палката“ од нашиот најдобар тренер во Македонија и пошироко, Јошко Миленкоски кој и оваа година останува дел од стручниот штаб во улога на советник. Се надевам од помош ќе бидат неговите совети како и до сега и неговите тренинзи кои ги водевме низ многу години, и се надевам на добра соработка и добри резултати.

Нашите амбиции во Европската златна лига се два-три добри натпревари и победи, а за останатите репрезентации кои се дел од ова натпреварување е само едно добро искуство и каде акцент ќе ставиме на помладите играчи кои годинава ќе бидат малку повеќе застапени. А поискусните, повозврасните, ќе треба да ни помагаат и бидат дел од квалификациите за Европското првенство кои се нашата цел и со желба повторно бидеме дел од европските првенства – вели Наковски.

Состав на македонската одбојкарска репрезентација:

Техничари: Ѓорѓи Ѓорѓиев (Бурса-Турција), Давид Стојанов (Фужинар-Словенија)

Коректори: Никола Ѓорѓиев (АЦХ Љубљана – Словенија), Стојче Арсов (Работнички 71&22), Кристијан Илиев (Струмица 47&72)

Примачи: Владо Милев (Струмица 47&72), Лука Костиќ (Рибница – Србија), Стојан Илиев (Анагенисис – Кипар), Тоше Ефремов (Весна Пробиштип)

Средни блокери: Филип Маџунков (Хасроде – Белгија), Филип Савовски (Војводина – Србија), Филип Лепидовски (Таково – Србија), Михајло Мирасчиев (Штип УГД)

Либера: Дарко Ангеловски (Работнички 71&22), Костадин Ричлиев (Штип УГД)

Распоред на натпревари во Европска златна лига 2024:

17.05.2024 (Струмица, 20.15): Естонија – МАКЕДОНИЈА

19.05.2024 (Струмица, 20.15): МАКЕДОНИЈА – Чешка

25.05.2024 (Беверен, 17.30): МАКЕДОНИЈА – Азербејџан

26.06.2024 (Беверен, 15.00): Белгија – МАКЕДОНИЈА

31.05.2024 (Осиек, 19.00): МАКЕДОНИЈА – Хрватска

01.06.2024 (Осиек, 19.00): Шпанија – МАКЕДОНИЈА

Двојна битка против Грција: Македонија ги доби противниците во битката за пласман на ЕП 2026 во машка и женска конкуренција