Грчката полиција спаси група од 92 илегални мигранти кои беа најдени голи, а некои со повреди, во близина на нејзината северна граница со Турција, соопшти полицијата во саботата.

Мигрантите, сите мажи, се откриени во петокот во близина на реката Еврос што ја означува границата меѓу Грција и Турција, се вели во соопштението на грчката полиција.

Истрагата на грчката полиција и претставници на граничната агенција на ЕУ Фронтекс откри докази дека мигрантите ја преминале реката на грчка територија со гумени чамци од Турција, соопшти полицијата.

Граничните полицајци откриле 92 илегални мигранти без облека, од кои некои имале повреди по телото“, се вели во соопштението. Не беше јасно како и зошто мажите останале без облека.

Грчкиот министер за миграција Нотис Митарачи рече дека третманот на Турција кон мигрантите е „срам за цивилизацијата“. Тој рече дека Атина очекува Анкара да го истражи инцидентот.

Грција ја повика Турција да го почитува договорот од 2016 година со Европската унија во кој Анкара се согласи да го запре протокот на мигранти кон Европа во замена за помош од милијарди евра.