Најдобриот шоумен на рокенролот, Мик Џегер, денеска полни 80 години, но се чини дека фронтменот на „Ролинг Стоунс“ не старее, барем не покажува знаци на стареење.

Тој ќе го прослави роденденот со голема забава во југозападниот дел на Лондон, пишуваат британските медиуми.

Џегер за јубилејниот 80-ти роденден ја изнајмил познатата градина „Челзи физик гарден“ (Chelsea Physic Garden) во југозападен Лондон за 300 негови најблиски пријатели и соработници, вклучувајќи ја и партнерката Мелани Хамрик и неговите колеги од бендот Рони Вуд и Кит Ричардс.

Како дел од роденденските прослави и оддавање чест на една од најголемите британски ѕвезди, „Ла галери де линстант“ (La Galerie de L’instant) во Ница ќе ја одбележи шестдецениската кариера на Џегер со изложба на некои негови легендарни фотографии.

Лошо момче, врвен секс симбол, неспоредлива рок ѕвезда, Мик Џегер со децении е на насловните страници и продолжува да ја освојува публиката со своите настапи.

Тој неодамна беше на турнеја низ Европа со „Ролинг Стоунс“ за да ја прослави 60-годишнината на бендот. Турнејата заврши минатата година, првпат без тапанарот Чарли Вотс, кој почина во 2021 година.

Со песните како „Jumpin’ Jack Flash“, „Gimme Shelter“, „Sympathy for the Devil“ и „Not Fade Away“, Џегер помогна да се активира културната и социјалната експлозија од 1960-тите.

Харизматичниот фронтмен изгради репутација која ги поместува границите, целосно искористувајќи ја сексуалната револуција и рекреативната употреба на дрога.