Финците се македонско одбојкарско „дежа ви“ чувство. На двете наши европски првенства, одиме на нив на отворањето со идентична мисла – можеме да играме. Го покажавме тоа со освоениот сет на собирот пред две години во Љубљана, со водството од 20:16 во првиот, со 23, 22 и со 21 освоен поен во загубените сетови. Бевме на една, најмногу на две топки до целосен успех, но не ни се посреќи. Ниту тогаш, ниту сега, Македонија не ја чека среќата, туку игра за неа.

– Не е подобра репрезентација од нас, но сè ќе зависи од нашата верба, храброст и зрелост. Го гледав првиот натпревар со нив и навистина загубивме на ситни работи, а во нашата игра има можност за напредок уште 20 или 30 проценти. Доколку успееме да се подобриме за 10, мислам дека ќе ги победиме – убеден е капитенот на македонската одбојкарска репрезентација, Никола Ѓорѓиев.

Иако финскиот селектор Џоел Бенкс промени седуммина од таа пресметка, на теренот главно ќе решаваат исти одбојкари. Отсуството на примачот Силтала може да значи нивна несигурнот токму во тие еден до два решавачки поена во сетовите. Но, ние ќе бидеме вистински само доколку се насочиме кон себе, а со тоа да го покажеме најдоброто македонско.

Николиќ е нов селектор на македонската одбојкарска репрезентација

– Прво што мора е да веруваме во себе, да бидеме храбри и зрели и да издржиме на нивната игра. Јас знам како тие ќе играат, ќе ни ја даваат топката и ќе направат малку неизнудени грешки. Тука треба да бидеме луцидни и зрели и да бидеме храбри. Не смееме да играме женска одбојка,туку мораме да ги нападнеме уште од првиот здив и веднаш да им најавиме дека дојдовме тука за да ги победиме, нешто слично како што направивме со Белорусија, Словенија, Турција во вториот натпревар во јануари во Скопје. Исто така, многу работи ќе зависат од одбраната, а тие играат многу добра одбрана, па ние ќе треба бидеме трпеливи и да ја градиме играта. Не мора секогаш да завршуваме од прва, ќе се играат долги поени. Трет фактор ќе биде нашиот сервис, а мислам дека во овој елемент имаме голем напредок во однос на Европската лига и тоа ќе го покажеме на овие натпревари, така што ќе си овозможиме полесни поени од нашиот блок, или, пак, блок-одбрана напад, а зоштода не и директни асови – вели Ѓорѓиев.

Распоред на натпревари на ЕП 2021

Група „Ц“, Тампере (Финска)

1 септември Македонија – Финска (18.00 часот)
3 септември Македонија – Холандија (19.00 часот)
5 септември Македонија – Турција (13.00 часот)
6 септември Македонија – Шпанија (16.00 часот)
8 септември Македонија – Русија (16.00 часот)